【點新聞報道】正所謂「沒有比較就沒有傷害」，有移民加拿大的港女發文大嘆，好多留港的朋友人生都上晒軌道，反觀自己還是一副游魂的樣子，對未來依然好悲觀。她不禁懷疑當初移民的決定，「有時都會諗不如趁後生番香港拼搏下啦」、「再諗番如果我喺香港，應該都生活得好舒服」。
該名移加港女在港時是一名護士，她日前在社交平台threads以「移民三年有感」為題發文，指「到咁上下年紀睇番香港嘅朋友，好多唔係結婚就生咗小朋友，就算未，人生都上晒軌道，有做護士有老師有政府部門，就算依家經濟好差都影響唔到。雖然唔會發達但只要輕鬆投資下我諗都可以生活得好舒服。」
反觀樓主則在加拿大游魂、躺平，「自己仲喺到游魂，供車租樓保險交稅無咗一大截，好彩係走之前都拎住少少錢過嚟做下投資未致於靠晒份人工，但對未來依然好悲觀。」樓主又指加拿大生活令人無晒動力同鬥心，「依家好有喺加拿大躺平嘅感覺，呢到個vibes係懲罰努力工作嘅人，買股票capital gains都要分50%走，喺呢個環境下完全無動力搵錢。」樓主不禁懷疑當初移民的決定，「有時都會諗不如趁後生番香港拼搏下啦」、「再諗番如果我喺香港，應該都生活得好舒服」。
樓主對比兩地生活，「香港做返護士無ot無壓力(當然都睇咩setting），就算輕鬆mode收入不成問題。加拿大就係慢活，就搞轉牌都用咗3年，搞pr兩年，咁呢到個culture係咁唯有接受同融入，變相自己都會變成好慢好無衝勁。」
樓主坦言感到迷惘，「雖然我唔抗拒呢種生活，但自己重後生，係咪應該喺香港衝多幾年，好過喺到躺平，同埋自己留喺到都要繼續等轉牌再慢慢重新建立事業，始終又唔係後生。」
有同樣移加的網民十分認同樓主，並表示已買了機票閃人，「其實留多幾年都唔會有咩希望，我都買咗機票閃人。你諗下香港你同期嘅同學依家一個月儲到嘅錢分分鐘係你嘅3倍以上，喺加拿大份糧扣完稅後得嗰3、4千蚊，仲要交2千幾蚊租層只係值60皮加紙嘅木板condo。
然後仲要同自己講嚟加拿大係為咗平靜嘅生活，冇咁重視金錢同物質，追求嘅係人與人之間既peaceful，追求有山有水同大自然嘅聯繫......成班友移民移到好似變晒佛教徒+環保人士咁」。
收藏
取消收藏
分享
