【點新聞報道】歌手陳奕迅《FEAR and DREAMS:NOW is the only reality》近日於香港舉行首映並一連放映4場，當中第4場特別邀請了一班圈中好朋友來到觀看，包括容祖兒、楊千嬅、梁漢文、馮德倫、許志安、郭偉亮、葉佩雯等。Eason更自爆媽咪從新聞得知他有焦慮症，大為緊張，他隱瞞是不想媽媽擔心。
千嬅看過紀錄片後直言意想不到Eason這次旅程這麼精彩，最希望他可以做回30年前那個陳奕迅「牙牙擦擦」、「開開心心」。容祖兒則覺得心情非常複雜，真正感受到Eason是一個將生命奉獻給工作的一個藝術家，作為一個同行她說：「我覺得有啲部分，我好似睇緊鬼片一樣，好緊張，直頭係感同身受，完全感受到佢個fear。佢好似打咗一場仗，一個個難關去克服，佢經過今次後，應該冇嘢可以再嚇到佢。」
蘇永康透露在Eason打網球受傷時，一直於醫院陪伴，亦在對方未康復、總是擔心耳仔聽不清時，不時通電話，安慰不用擔心：「人生入面有很多fear，可能有時有一些問題，不能馬上解決，就先放一邊，學習與問題共存，終有一日可以解決的。」梁漢文很早已知道他的一些感受，像早期要取消香港站，正好他們正一起打網球，打到一半收到消息，感受到他的fear。
許志安看完紀錄片坦言自己的心也舒服了不少：「感受好深，鏡頭前都係好真實嘅佢，兩三年前，我都有fear嘅時候，佢寫咗首歌比我，我好佩服佢，佢生病過程當中，仍然可以咁強。套紀錄片直頭係一粒藥，可以交比其他有病的人食咗好返個種！有呢個朋友，真係好正。」
Eason在歌迷分享場中則自爆一直沒有告訴媽咪自己有情緒病，怕對方擔心，但新聞一出，媽媽馬上打來問他為什麼會這麼大壓力：「其實我真係唔係好緊要，我個病係好輕微，唔係嚴重到行唔到出房門口嗰種。大家唔使好擔心。」
Eason巡迴演唱會完結後，在家中沒有工作，竟然腦子開始在想下一次演唱會應該做些什麼，他說：「我直頭係諗不如開個大場，自己唔使咁辛苦，開場不如用《亞士匹靈》，《他一個人》都要唱，諗諗下自己摑自己一巴，咩事呀，放假啦，你仲諗！哈哈哈。我不時係演唱會入面吹水，話不如下次是但就咁唱下歌吹下水咪得囉，但係我反問自己，其實係唔得㗎，我做唔到，我要有故事骨幹，我依家已經乾晒，或者去下西班牙、意大利、巴西，去唔同地方睇騷，吸收下唔同文化。睇騷真係好開心，好似我嗰日睇BIG FOUR好開心，覺得許志安好有型，有衝動練下肢體Fit啲。」
（點新聞特約記者陳惠芳報道）
收藏
取消收藏
分享
