文/稀思路
早幾個月，英國有意修訂移民相關法例，對象可能包括用BNO「5+1」計劃移英嘅港人，「5+1」隨時變「10+1」，搞到一班移英人士「有得震，冇得瞓」，如果讀者問筆者，筆者肯定覺得移民英國、等攞永居嘅古怪嘢會越來越多，最近發生喺英國一個攞到英籍又被撤銷嘅例子更話畀人聽，英國政府條件多多，除咗可能等申請果下延期，分分鐘就算申請到永居，都隨時講bye bye。
話說，一位先生喺英國生活咗「5+1」年，仲成功申請埋英籍，再申請埋英國護照，喺佢攞到護照後一年內，就離開咗英國去加拿大做嘢，之後當佢再更新護照時，英國相關部門就出信畀佢，話已經褫奪咗佢嘅英籍。
到底中間發生咩事，原來英國政府有明確指引，所有申請入籍嘅人，都要有「永久居住英國意圖」，入籍申請表上亦會問申請人有冇意圖「永久居住英國」，由於事主表示會，但佢攞到英籍後又去咗加拿大做嘢，所以被認為係「欺瞞」而失去英國國籍。事主曾經搵律師上訴，但最後失敗。有律師就話，如果佢要攞返英籍或者永居，就要「由頭嚟過」。
事主呢種案例係咪罕見，筆者唔敢下定論，但如果講英籍要有永久居住意圖，似乎連黎智英都未必有（因香港國安法正受審），筆者就覺得，申請英國入籍時，有條法律喺度，但英國相關部門一般有斟酌權（discretion）決定運唔運用權力；事主係咪有「欺瞞」成分可以討論，但會唔會現實係，英國其實係想盡方法減少移民數目？
喺英國，反對移民已經係部分本土居民嘅共識，讀者們如果睇下新聞，會發現近期英國又爆發唔少反移民示威，例如上月底喺倫敦東北方小鎮艾平（Epping）就出現示威活動，而且其中一場示威更令到8名警員受傷，警方拘捕咗十幾人。對於普通英國人而言，可能唔理你係香港人、非洲人定係烏克蘭人，總知就係影響到當地生態。
有人話，英國嘅反移民示威，係針對非法移民，而唔係針對合法移民包括移英港人，但之前英國大選，其實英國嘅極右政黨，所反對嘅係醫療外勞以外嘅「移民」，即係應該包括移英港人。上至政府、中至政黨同下至民間都反移民，移英港人可以選擇繼續喺英國生活，但唔好呃人、呃自己，認為移英港人喺英國受歡迎，否則就唔會有咁多人回流。
收藏
取消收藏
分享
