【點新聞報道】關智斌（Kenny）早前接受訪問，形容時隔6年再開演唱會興奮又期待。他更重提2019年被張致恒「一腳踏五船」連累、演唱會險被擱置，直言「我係適合危難中成長。」
Kenny主動重提2019年演唱會，「當年係有少少意外發生，有好多波折，原來我係適合危難中成長，要咁樣先得。」自完成那次演唱會後，Kenny腦海中籌劃一個全新舞台，他透露「呢個騷喺心入面已經醞釀咗兩三年，到時會呈現一個冒險島舞台，脫離現實氛圍，同觀眾感受一個長不大的晚上。（觀眾好想睇你除衫？）呢個係標準配置，到時會大方啲，還有俾驚喜大家。」
另外，Kenny相隔4年才推出新歌？他直言性格隨心，形容如小飛俠彼得潘、嚮往自由自在。他亦慶幸父母在他小時候，給予他足夠的自由。「我小學六年班放學後去接妹妹放學，之後買飯盒兩個人食；中學零用錢唔夠就幫人補習，又可以買遊戲機，父母畀咗我呢個空間，令我學識點同人相處。」
不過Kenny坦言人大了很難找到自在的感覺，他會給自己安排Me Time，讓自己減壓，「我幾鍾意一個人做運動、跑嚇山，留家坐喺梳化睇電影，布萊德·彼特嘅《World War Z》，我睇咗十幾次。」
提到新歌《永遠的彼得潘》是首次跟監製陳巧威合作，Kenny笑稱對方發掘出充滿「仙氣」的關智斌，「佢搵到我一把幾出塵嘅聲音，唔係特登放輕把聲就會唱到呢個感覺，佢將我嘅仙氣帶咗出嚟。」
（點新聞特約記者陳惠芳報道）
收藏
取消收藏
分享
稿件由上傳 · 文責自負 · 不代表本網立場
