【點新聞報道】近日羅家英接受訪問，家英哥繼續敢言作風，直言近年少去揼骨卻愛上「按pat pat」，又常與老婆汪明荃吵架，家英哥更大彈阿姐演粵劇「跌咗分」。
四度患癌的家英哥宣布放棄電療與化療，問及事前有否徵詢阿姐意見，家英哥說，「阿姐冇俾意見我，不過我諗佢係同意嘅，佢都係出嫁從夫，丈夫話事，何況條命係我嘅，佢點話到事呢？」那家英哥與阿姐平時都是靠報道知道對方消息？例如當年家英哥被影到去揼骨？家英哥說，「佢（阿姐）贊成我去揼骨㗎，現在少咗因揼骨都冇特別好到，後來買咗嗰啲按摩器，將佢（按摩器）放落自己個pat pat度，將佢鬆咗，我行好多路，以前行一個鐘頭要抖，但而家唔使！」
家英哥近日正籌備劇本《柳如是》，他說，「我覺得我嘅年紀好適合做錢謙益，因為佢70歲，就搵咗柳如是（明末清初名妓）做老婆。」被問到「娶個後生靚女嘅老婆，會唔會都係你嘅心願？」他直言，「係每個男人嘅心願！（你唔怕返屋企要跪玻璃？）佢鬧我亂講嘢囉，慣咗！（有無覺得你改變咗阿姐？）佢改變咗，我肯同佢講道理。以前我唔鍾意同人哋辯論、解釋。（通常邊個拗贏？）佢（阿姐）好堅強、好硬頸，自己認為啱嘅嘢就去做，但未必係啱嘅，講道理咋嘛，佢認為啱聽就聽，唔啱聽就算！」
家英哥直言，跟阿姐最常爭吵的話題，正是他最執着的粵劇演出，「佢（阿姐）鍾意演電視劇、唱歌、跳舞，但佢唔係好鍾意演粵劇，佢俾嘅時間冇其他咁多，我話佢，但督促唔到，亦都教佢唔到，佢唔係好想我教，我嫌佢唔好，可以好啲！」對阿姐的粵劇演出有何評價？他直言，「跌咗分！1987年至1988年，佢同我做《穆桂英大破洪洲》，如果佢嗰時係90分，而家最多得返60分！（你小心啲喎！）唔使小心，佢係鬧我，話我唔讚佢，但我唔係鍾意讚人嘅人。」
不過，家英哥也讚老婆心腸好，能跟阿姐拍拖，他也有些感恩。問及怎樣追求阿姐？他說，「都唔係點追求，大家互相碰埋一齊。」他又否認向阿姐求婚19次，更言做新聞而已。
（點新聞特約記者陳惠芳報道）
收藏
取消收藏
分享
