文/稀思路
過去10年，社會各界喺批評美西方勢力時，好鍾意用到一個詞，叫做「雙重標準」，例如當香港警方執法拘捕滋事者時，外國政客會話香港警方「打壓示威」，點知到外國有示威喇，原來美國等警方，會直接示範「打死示威者」，之前香港有黑暴運動，外國政客「High爆撐暴」，結果到英美有暴動，原來為咗加快示威者入獄，英國連法庭嘅審訊程序都可以「提速提量」。最新嘅「雙重標準」例子係邊個？就係歐盟是也！
話說，袁弓夷、何良懋等通緝犯喺海外大搞所謂「香港議會」，喺香港憲制以外「另搞議會」，涉事19人被香港警方通緝，合情合理，偏偏「多事」嘅歐盟，竟然發聲明話要譴責通緝行動，甚至聲稱香港警方嘅做法係「恐嚇歐盟公民」等等，筆者十分懷疑，有人喺香港特區外想另立議會，即係搞另一個政府或者議政組織，如果要維護國家、特區嘅安全，香港警方國安處行動，何錯之有呢？
可能歐盟、歐洲以至美國都冇乜記性，不如等筆者同各位分享返一個故事，西班牙嘅加泰隆尼亞自治區，喺2017年10月發動所謂獨立公投，當時大部分選民支持「脫離西班牙」，同月，加泰隆尼亞議會宣布獨立，西班牙政府就強行接管加泰隆尼亞，獨立運動領袖紛流亡或被捕。
事情之後嘅發展，可能讀者們都記得，9名要追求獨立嘅領袖，被判處9年至13年嘅有期徒刑，即係搞獨立，係要付出代價嘅，但呢個只係筆者想講嘅其中一部分，喺呢場所謂「獨立運動」中，歐盟有咩角色？當時，時任歐洲理事會主席圖斯克就表態支持西班牙，揚言「西班牙將繼續是歐盟唯一的對話夥伴」，歐盟執委會就表示「不希望加泰隆尼亞獨立，因為這會鼓勵其他地區仿傚，讓歐盟無法控制。」
喂呀，人哋自己議會經過投票話要獨立，西班牙點解要打壓，歐盟做咩要幫西班牙？原因好簡單，領土完整、統一以及安全，根本就係任何國家嘅底線，加泰隆尼亞搞獨立，超出咗一個國家可以接受嘅安全底線；講返到袁弓夷等人，佢哋嘅情況當然唔能夠直接同加泰隆尼亞比較，但有人試圖喺香港憲制秩序外「另搞一套」，想建立一套聲稱會為令「香港民主進步」嘅「議會」，香港特區政府以至警方，可以視而不見，任人顛覆同煽動？
有啲嘢可以與唔可以，界線好清晰，就如加泰隆尼亞搞獨立時，美國國務院都有聲明「重申加泰隆尼亞是西班牙不可分割的一部分，美國支持西班牙政府採取合憲措施，維持國家的強大與統一」，相同道理，有攬炒派政客喺香港搞「港獨」時，又唔見美國咁講？美西方政府以至政客，最鍾意將香港攬炒派政客嘅行為單純視為「爭取民主」，但奇怪喇，當有人喺美西方境內尋求「民主」時，原來民主國家都唔民主，咁西方國家嘅核心價值，又去咗邊呢？如果有人喺英國或者歐洲搞暴動、另立議會以至另立國家，我哋係咪又要講，人哋「想推動民主行一步」啫，呢啲係自由嚟？
收藏
取消收藏
分享
