【點新聞報道】正所謂無比較無傷害！近日有移民英國的港人發文大讚港鐵無得彈，「越去得多國家，越覺香港地鐵，真係黐Ｘ線」，還列舉出8個港鐵優點。不少網民均表認同，「無嘢嘛！只講車廂內環境香港已經完勝！」、「衰多10倍都仲係世界top」。
該名移英港人在社交平台threads發文列舉出港鐵優點，包括平（車費），而佢賺到錢；接近每個站都有step free access（無障礙設施）；列車有冷氣；鐵站用英文字母表示出口，盡可能消除Language Barrier（語言障礙）；八達通應該係最快嘅畀錢方法，絕對快過QR code、車飛，甚至信用卡paywave，而呢個技術係香港首創；對面月台轉車差唔多係絕無僅有，以及隱性人流控制，指車站設計有考慮人潮動線，所以好少會見一群人同你反方向行，並舉例旺角e出口兩條樓梯錯開。
樓主又讚港鐵排班次真係好叻，指「例如有人行咗落路軌，處理完可能10-15分鐘就開返車。英國可以因為一個人行咗入路軌封咗成條線，到捉返個人走之後，因為啲車亂咗，司機又唔係本身要出發嘅站，佢哋就會全日癱瘓」。
不少網民均表認同，「無嘢嘛！只講車廂內環境香港已經完勝！」、「有時我哋事之為理所當然嘅嘢 其實已經排緊世界前列」、「衰多10倍都仲係世界top」。樓主於是整理留言，得出港鐵其他優點，包括： 準時率高，超密班次；上到網；乾淨；大時大節照開；10號風球都仲可以有限度服務，以及車站指示清晰。
另有網民留言大踩倫敦地下鐵，「英國 tube 正垃圾」、「英國個啲絲絨櫈，好似一百年冇洗，啲站又舊又污糟，仲成日delay、壞、罷工」、「冷氣都冇，熱到痴晒線，仲要又細又殘舊，仍然停留在70年代，但係又貴到死，落後香港30年」、「倫敦的網絡算方便，四通八達，但車廂好焗，月台及通道都不及香港的乾淨。」
收藏
取消收藏
分享
