文/稀思路
近年，社會出現一股「唱衰香港」言論，但同之前唔同嘅係，「唱衰」範圍唔係喺政治或者法治層面，而係有人稱香港經濟「唔掂」，例如話係多咗吉舖、飲食業唔得，以至零售市場唔夠好等等；但係，呢啲言論能否反映整個社會真貌呢？稀思路認為唔可以，最基本原因，係因為香港依然維持低失業率、正經濟增長，唔同行業出現變化，可以係經濟轉型，而唔係經濟唔好。
要評論香港經濟、發展狀況，筆者認為聽專家講最為合適，世界著名經濟家傑佛瑞·薩克斯教授 (Professor Jeffrey D.Sachs)，日前（24日）就嚟到香港做演講，佢表示喺不斷變化嘅全球秩序中，香港前景光明；佢強調，香港可以利用獨特優勢，喺現今動盪嘅全球秩序中得益，香港健全嘅普通法框架，國際金融同貿易體系嘅深度融合，以及粵港澳大灣區其他城市嘅合作關係等等，都係香港獨特嘅條件。
另外，薩克斯亦讚賞香港喺促進全球金融創新同全球可持續發展方面具有潛力，事實係，當前經濟同貿易都不確定，而中國可以喺引領全球邁向可持續發展轉型方面，扮演着特殊角色；喺世界正在走向多貨幣體系時，數字貨幣、人民幣會發揮更大嘅功能，而喺呢個轉型過程，香港會扮演重要色。另外，香港作為大灣區重要組成部分，完全有能力推動「一帶一路」同大灣區發展成為世界領先金融中心。
要分析薩克斯一番話，可以分為三個層面，第一個層面，就係世界「立立亂」，尤其係美國嘅關稅政策為全球帶來不確定性，咁香港作為成熟嘅金融、貿易市場，自然會受到資金、企業嘅青睞，如果將資金放喺歐美唔穩當，放喺亞洲香港就係絕佳選擇；第二，就係當中國市場穩步發展，而香港又背靠祖國，香港絕對可以喺中國發揮「內外聯通」嘅優勢，既把握局勢不穩嘅機遇，又享受到國家發展帶來嘅紅利。
第三，肯定就係香港本身擁有嘅獨有條件，普通法體系、健全金融體系以至成熟嘅貿易網絡等等，係香港優勢亦係其他地方難以取代，三者相加，令香港喺全球「亂局」反而可以穩步成長。依家部分人睇住香港嘅市道發展，筆者都見到街上面有吉舖，但如果要睇香港經濟嘅全貌，其實仲包括貿易、出口等方面嘅增長，以及股市暢旺帶來嘅收入等等。有啲人鍾意唱衰香港，但到最後，通常都係香港變得更強。
作為一個不時睇唔同新聞嘅人，筆者都會上網睇到薩克斯嘅影片，薩克斯同樣值得留意嘅論述，在於佢經常指出美國發展唔好，係佢自身問題，甩鍋中國根本係無補於事；而且，美國其實阻止唔到中國前進同發展，再盲目打關稅戰，或者破壞同盟友以至中國嘅關係，其實都幫唔到美國。曾被稱為世界三大經濟學家之一，薩克斯肯定說出了重點，中國發展勢不可擋，如果美國仲係要諗住「統治全世界」，筆者亦只能夠講，美國政客嘅想法，實在係太傻、太天真！
收藏
取消收藏
分享
