文/稀思路
自從特朗普再次成為美國總統後，美國可以話係「多災多難」，特朗普喺上台前，話自己有能力處理俄烏衝突甚至加沙問題，結果，兩邊唔單止無停戰跡象，反而越打越激，筆者十分鍾意一啲專家分析，簡單嚟講，就係話特朗普「不能解決任何問題」！最近，美國得州出現洪災，特朗普再次成為抨擊對象，佢仲「發爛渣」，話要剝奪批評佢嘅人嘅國籍，筆者又咁講，美國嘅言論自由，原來就係當有人批評特朗普，對方就會被警告被奪去國籍，或者要遞解出境？
話說，國女名嘴、棟篤笑演員露絲奧當奴（Rosie O’Donnell），就喺網上批評特朗普，仲將得州洪災帶嚟嘅災難後果，直指係因為特朗普「徹底削弱了政府的所有早期預警系統和氣象預報能力」，阻礙聯邦政府嘅救援行動，相關言論引起好大關注。
向來面對批評唔會認錯嘅特朗普，當然係回敬露絲啦，特朗普就喺自己嘅社交平台表示，「由於露絲不符合我們偉大國家的利益，我正在認真考慮剝奪她的公民身份。她對人類構成威脅，如果愛爾蘭願意接收她，她應該留在那個美好的國家。上帝保佑美國！」筆者睇唔同新聞，原來露絲喺特朗普第二個任期開始後，就帶住自己12歲嘅兒子搬咗去愛爾蘭，仲講過佢會等到「所有公民在美都安全享有平等權利」時，才會返回美國。
一段批評，特朗普就推到咁盡，話要剝奪露絲嘅公民身份，讀者們係咪覺得太誇張？其實特朗普同露絲之間，喺接近20年前就有恩怨，當時美國小姐嘅選美活動爆出爭議，特朗普作為活動老闆，其應對方式就引來當時為清談節目主持人露絲嘅嘲諷。今次特朗普出口術，話要剝奪露絲嘅公民身份，睇嚟似係想報仇多啲喇。
之不過，特朗普想咁做，完全係亂嚟嘅，因為根據美國法律，就算係美國總統，都無權剝奪喺美國出生者嘅公民身份，而露絲呢，佢係喺美國紐約州出生嘅。一個由法律保障有美國公民身份嘅人，特朗普可以點樣剝奪人哋身份？呢件事嘅可笑之處，一在於美國政府本身救災不力，被批評係合理；二在於如果有人批評就會被奪去公民身份，咁美國嘅言論自由，又喺邊度呢？特朗普處理唔同事務都亂嚟，難怪前排美國有反特朗普示威，表明「不要國王」！
基本上，特朗普上台前講過會解決嘅問題，包括貿易、戰爭問題，特朗普只係將事情變得更嚴重，例如喺關稅問題，即使係美國嘅傳統盟友歐盟、日本等都唔願意向美國就範；國內特朗普又引起金融界、學界、公務員等反對，所以依家特朗普嘅支持度，亦進一步下跌。有一點，基本上至少一半美國選民係冇得怨嘅，就係特朗普呢個「國王」，係佢哋自己用選票選出嚟，如果美國各方面要有所好轉，可能要好似露絲咁，等特朗普下台先再算喇。
收藏
取消收藏
分享
