文/稀思路
過去10多年，香港出現過唔少亂象，好多攬炒派政客，搞完一單又一單，唔少人都質疑，點解一班擺明搞亂香港嘅政客，可以搞出咁多事；其實，香港嘅攬炒派政客，從來都唔係單打獨鬥，佢哋嘅主子或者老闆，亦唔係香港人或者香港市民，而係一班外國政客，例如美國眾議院前院長佩洛西，擺明就係支持黑暴，雖然黑暴已經過去，但筆者可以講句，美國係「從來都冇放過香港」。最新消息，就係喺黑暴期間同黃之鋒等人過往甚密嘅伊珠麗（Julie Eadeh），可能會成為美國駐港總領事，如果係真嘅，筆者想問下美國政府有咁嘅安排，想玩咩？
近期喺唔同媒體，都開始有風聲咩人會接任美國駐港總領事，有消息就指伊珠麗接任嘅機會好大，呢個伊珠麗，接任得總領事呢個位，當然亦唔係「等閒之輩」。2019年，黑暴運動演得正烈時，有人就發現黄之鋒、羅冠聰同兩個港大學生代表，就喺金鐘一間酒店密會一名美駐港領事館高官，之後《大公報》就爆料，話呢個人就係當時嘅美領館政治部主管伊珠麗。一個喺黑暴期間密會香港攬炒派青年嘅美國外交官，係咩人，心照啦。
佢哋當時會面講過咩、做過咩，外界當然唔會知，不過，事後嘅黃之鋒似乎就「鬼拍後尾枕」，話當日佢哋有交流制裁香港嘅所謂《香港人權及民主法案》，又有關於美方唔會向香港提供防暴裝備嘅內容。有分析就指出，喺佢哋會面無耐，黃之鋒嘅「香港眾志」就開始搞9月全港大罷課，呢班人圍威喂「密密傾」，明顯係針對特區政府，甚至係睇下點繼續支持黑暴運動。
香港作為國家嘅重要特區，過去多年都係全世界人士包括各地政客、間諜活躍嘅地方，所以美國駐港總領事嘅地位亦相當重要，如果要派一個熟知香港情況嘅人嚟做總領事，筆者係理解嘅，但係，如果派一個擺明同香港攬炒派過往甚密嘅人嚟做總領事，筆者就會十分懷疑，將上任嘅美國駐港總領事，其實係咪有政治任務在身？
經歷過黑暴運動，即使係以前唔相信香港有外部勢力干預嘅人，都冇得再否認外部勢力唔單止有支持香港嘅違法抗爭行動，甚至連外國政府嘅領導，都表明支持香港嘅反對者，而直到近年，社會各界都開始對美國政客喺香港活動有所避忌，怕畀佢哋煽動，更加怕畀佢哋利用！喺呢個情況下，美國政府如果仲畀伊珠麗做駐港總領事，係咪即係話，要畀一個「亂港政客的朋友」喺香港，負責同香港各界嘅聯繫工作？依家中美關係雖然緊張，但美國都好需要同中國搞好關係，以免喺關稅戰入面「輸得更多」，若然要委任一個「香港反對派朋友」嚟做總領事，受過黑暴運動影響嘅香港市民，相信會相當反感，覺得美國又喺度玩嘢。
收藏
取消收藏
分享
