文/稀思路
如果讀者有睇開稀思路文章，可能會留意到兩三星期前，筆者有篇文係講阮民安涉嫌喺超市偷嘢，當時文章標題仲串佢「應承我 準備再坐監」啦，但鏡頭一轉，事情又有離奇新發展，本身日前（9日）要上庭嘅阮民安，並沒有出庭應訊，仲喺Facebook話自己已經離開香港，即係「着草」了！前兩三星期先話自己畀人屈，今個星期就「着草」，當中發生咩事？唯一合理解釋，就係佢有偷嘢囉！
根據阮民安「最新嘅講法」，佢聲稱自己一直被針對、滋擾，佢咁多講大話往跡，信唔信佢，讀者可以自己諗，而佢今次說法，認真相當十分神奇，佢話自己喺街同便依警察講，「我依家就入惠康直接拎野出嚟，記得拉我同打我 (可能係好負面嘅行為但佢哋真係逼到我頂唔順)」，跟住自己真係喺超市拎咗啲嘢走，呢個盜竊過程，係自己同警察講去偷嘢，然後又真係自己去偷嘢，再然後就係等畀警察拉。
對於呢個講法，筆者真係有一萬個「黑人問號」，阮民安嘅說法，等同做賊嘅人，先同警察講去打劫，然後又喺警察面前打劫，呢個「故事」，讀者們信唔信？我哋成日話人講大話連「三歲小朋友」都唔會信，如果要搵人相信阮民安，唯一有可能信佢嘅人，可能就只有盲反政府反上腦嘅“黃絲”。
阮民安可能以為讀者、市民都係冇記性，但筆者仲記得，之前喺佢被捕之後，曾經講過「記得拎單，14蚊好，140蚊好，1400蚊都好！原來有起事上嚟，單係咁重要」，佢當時講法嘅意思，明顯係想講買嘢有畀錢，只係唔記得拎單據；到依家，佢又話自己係擺明去偷，兩個講法，前後矛盾，肯定有講大話，如果以佢最新講法作準，就係佢就算點「扭」個故仔都好，偷嘢係真嘅。
人無恥，則無敵，喺阮民安嘅網上「自辯」，仲話如果覺得佢真係會去偷140元嘢嘅人，「可以走先」，因為智商有問題。其實，件事應該掉返轉諗，如果信佢唔會偷嘢嘅人，先至要去驗下智商！之前佢點解坐監？係因為佢連同其他罪行，當時虛構「暴動少女」去籌錢，然後仲畀人發現佢籌錢有部分入咗馬會戶口，一個擺明偷呃拐騙嘅人，好難叫人信佢唔會偷嘢？
筆者睇阮民安Facebook留言，其實部分網民都好理智，認為佢肯定係偷完嘢搵藉口，但仲有少少網民（可能係佢支持者）認為佢係被屈嘅；講真，一個人親口承認自己入超市攞嘢冇畀錢，點可能仲係畀人屈或打壓？見到阮民安嘅「不完美謊言」，筆者就諗起有套電影，有個男角色話自己唔係背叛女友，只係其他女仔強行用個嘴錫落佢個嘴一樣，阮民安不愧曾為娛樂圈中人，能夠將完全不合情理嘅電影橋段用喺現實生活，果然係一個「有創意嘅賊仔」！
收藏
取消收藏
分享
