文/稀思路
日前（4日），美國總統特朗普簽署「大而美」（大而醜）稅收和支出法案，根據特朗普嘅講法，法案通過會令美國經濟等都會「更好」，但奇怪嘅係，喺法案通過時，全個美國就有幾十萬人喺街上參與「解放美國」大規模示威活動，表明對特朗普政府嘅政策表達不滿，仲有民眾表明「不滿意這個國家的治理方式，我們已經受夠了！」對於特朗普又「成功」地激發幾十萬人上街，到底「大而醜」法案係咩一回事？
呢個示威行動，示威者一共提出幾個訴求，包括「將美國從貪婪的億萬富翁手中解放出來」、「將美國從貧困中解放出來」、「將美國從任意解僱和大量非法政令中解放出來」以及「將美國從仇恨和恐懼政治的枷鎖中解放出來」。之前，其實美國已經出現過「不要國王」嘅反特朗普示威，如今示威活動又一次升級，睇嚟特朗普搞「內亂」真係有一手。
對於特朗普嘅法案，可能唔少讀者都唔係太了解，尤其係點解特朗普一邊大力唱好法案，但另一邊就有反對者用激進行動去反對，筆者用四個字去概括法案，就係「劫貧濟富」，點解咁講？筆者喺網上睇過啲詳細報道，原來法案支持企業稅率由2017年減稅前嘅35%，永久降至21%，仲會延長或增加針對企業嘅其他稅收優惠，例如買新機械、設備同研發，都可能會有稅務優惠。
減稅、刺激投資，好正常吧，但呢個法案「又點止咁簡單」？特朗普減稅同時，都會減低醫療補助，即係窮人要當災，呢個「大而醜」法案，喺未來10年可能導致1200萬美國基層失去醫療保險，其他扶貧措施例如食品券項目等都會削弱；即係特朗普一邊減稅，一邊都喺度大減美國基層嘅福利，難怪曾經作為特朗普親密戰友嘅世界首富馬斯克，都大力反對法案，甚至揚言如果法案通過，佢就會即刻成立新政黨。
富人減稅收，窮人減福利，呢件事「劫貧濟富」嘅味道確實相當濃厚，難怪喺美國咁多人走出嚟示威，成件事嘅贏家，就係一班企業以至高收入人士；美國基層呢？Sorry，特朗普可能係連基層睇醫生、攞食物援助條後路都想斷。從自由經濟角度，減低稅收可以刺激經濟，但係減基層福利，好明顯就係進一步迫對方入絕路。
美國經濟嘅問題，其中一個大問題就係財赤，依家美國國債已經高達大約36萬億元，唔少專家都覺得，美國咁搞落去遲早破產，而「大而醜」法案嘅奧妙之處，仲在於法案會喺未來十年，大約令美國財赤增加超過3萬億美元；即係話，特朗普係「益」有錢人嘅同時，仲可能加快美國政府嘅財政崩潰。啲人成日話「民主好」，民主可以解決好多問題，當民選嘅特朗普一步一步將美國推向懸崖，民主何止「好」，直頭「好」到可以摧毀美國！當初投票畀特朗普而被解僱嘅公務員，或者變得更窮嘅基層，到底依家諗緊乜，有冇後悔？
收藏
取消收藏
分享
