【點新聞報道】玩交友APP真係要帶眼識人！有港女日前在網上大呻遇上「食飯詐騙」，指在交友App結識了自稱任職消防員的男網友，相約出來到元朗一間西餐廳吃晚飯見面，兩人點了二人餐，男方再額外加多半打特價生蠔，埋單要1,630元，男方要求港女先付款，稱之後會給她現金，豈料當兩人去到商場取車時，男方竟「借屎遁」逃去無蹤，之後更在App封鎖她。港女嬲爆直指「X街！我呢世人都未食過咁貴嘅一餐飯，正人渣！好X嬲」。為免更多人受害，港女決定放上網公審對方。
該名港女在社交平台threads發文憶述，自己透過交友App結識一名男子，對方自稱是消防員，約她到朗屏一間西餐廳食飯見面，「當見到價錢牌時都覺得貴，二人餐要$1400以上，但佢話唔緊要話佢請我，又話會食完車我返去，佢仲額外再叫半打特價生蠔，但埋單時話信用卡被人盜用，要我幫手埋單，之後再撳返現金畀我」。
港女表示，用餐期間，男方已不斷發愁，「其實全程飯佢都話被人盜用信用卡碌左成廿萬好愁…舖好哂路畀我睇」。樓主曾提出「AA制」被拒，「我都有講餐飯成$1600咁貴可以AA一人一半，我都唔好意思第一次見要人請，佢堅持話佢請…」，男方還約她去行山，以減低她的戒心。
當兩人走到停車場取車時，男方竟「借屎遁」，「佢話要去廁所，我就順便去樓上女廁，佢話去男廁附近日本城等，OnＸ的我真係去等佢，我去到唔見佢，當時仲tg佢，佢仲有覆話爆緊石，我都驚驚地唔知佢會唔會走咗，點知佢真係block 咗我」。
港女發現自己被騙，才如夢初醒「頂….好L慘呀！ 怪不得我食飯時話影合照時佢拒絕啦」，鬧爆「X街！我呢世人都未食過咁貴嘅一餐飯，正人渣！好X嬲」。幸好樓主有影低對方的樣貌，為免更多人中招，決定放網上公審，「推爆佢！唔該！」。
樓主其後再補充「其真我有係tg用另一戶口同佢講，我影咗佢相，如果唔畀返錢我，我po上網，佢都無理我再block我 ，如果慣犯，一定要令更多人知道佢惡行！！！我唔怕俾人話，但我想更多人知唔好受騙！」。
有網民留言表示遭同一男子騙過，「我比同一個人呃過！！！！！！！！用同一個故事又係話張卡俾人盜用又係話去爆石！個時同佢食放題 正pk!! 但嗰時佢話自己做救護」、「我都比同一個人呃過…」。樓主表示「經過一晚已過萬轉發！暫時加埋我已有4位受害人，即係佢係慣犯黎，厚面皮，唔驚被公開。」
帖文引起網民熱議，有人大讚樓主「你都醒目偷拍咗個X人」、「我唔會話你，你係受害人點會話你，話你嗰d都無同理心」、「樓主叻呀有相」、「支持你，你公開佢啲衰嘢係啱㗎，，經一事 長一智，以後小心啲」。有網民建議樓主報警，「報警啦，cctv有機會捉到」、「問餐廳拎cctv 報警，報東張」。
收藏
取消收藏
分享
