文/稀思路
讀者們如果有睇開稀思路嘅文章，會發現一個不時重複嘅道理，就係「攬炒派」鍾意「吹得就吹」，將啲嘢講到好大，但事實係點呢？就係佢哋搞嘅組織、推嘅行動，好多都係非法，仲要係累街坊嗰隻，非法「佔中」係一個例子，「黑暴」就更加典型。最近，一班潛逃、流落在外嘅「攬炒派」人士，搞咗個所謂「香港議會」選舉，筆者先要問，人都不在香港，什麼「香港議會」？一班「攬炒派」人士，根本沒有資格「代表香港」！
之前，筆者已經寫文講過，立法會、區議會等喺香港憲制之內，但香港絕對沒有所謂「香港議會」，「香港議會」嘅本質，就係一班「攬炒派」基於不同原因離開香港，有通緝犯、有移民嘅，佢哋搞非法議會扮參政、議政，佢哋搞死自己係必然，但如果有香港人真係參與佢哋選舉，包括投票，隨時招致刑責（當然，專害支持者都係「攬炒派」作風）。
筆者上網睇佢哋嘅所謂「當選」名單，除咗一班人根本唔喺香港外，佢哋仲有一個特點，就係啲「當選人」近乎係冇人識，一班冇人識嘅移民，代表香港？唔好玩啦！佢哋有個所謂「票王」姜嘉偉，筆者嘗試去搵下佢資料，結果，呢個曾自稱係「Free HK Media」創辦人嘅「姜牧師」，原來都涉及唔少罪行，例如曾承認「串謀作出一項或多項具煽動意圖的作為」罪，被判入獄8個月。另一宗涉案，就係2021年6月於銅鑼灣聚集，被票控「參與受禁群組聚集」罪案件，他被裁定罪名不成立。之後，佢就動身離開香港。
一個「票王」，先唔講佢有「幾多票」，原來係一個喺香港搞事被判囚，之後着草離開香港嘅人，讀者們可以諗下，佢哋到底「代表」香港什麼？如果真係講選舉，佢哋最多最多，就係「海外攬炒派小代表」，因為佢哋唔代表香港，唔代表海外港人，頂盡就係海外攬炒派「小圈子」選舉。
另外，「香港議會」嘅主要搞手——袁弓夷，讀者好容易就知道，佢係一個香港國安法嘅通緝犯，一個嚴重罪行嘅通緝犯，佢本身犯法，佢搞嘅選舉又非法，用上「香港」兩個字作招徠，根本就係呃人。過去多年，「攬炒派」擅長用各種所謂「選舉」、「初選」去呃支持者，好多時，大家最後都會發現，上錯「攬炒派」賊船，隨時刑責上身，袁弓夷等人害香港、害市民，仲想害到幾時？
收藏
取消收藏
分享
