文/稀思路
近排，喺網上睇到條片，片段重溫美國總統特朗普曾經講過嘅「豪情壯語」，包括「我是傳遞和平的總統」、「我會結束烏克蘭戰爭，我會阻止中東的混亂」、「我想拯救生命」、「在我領導下，我們不會再有戰爭，不再有分裂」等等，今日美國人以至讀者睇返特朗普呢啲說話，原來已經唔係笑話咁簡單，而係反話，由國內嘅矛盾同分裂，到美國直接轟炸伊朗，筆者有種感覺，特朗普真正嘅身份，應該係「美國終結者」。
美國「助拳」以色列，喺誤導伊朗嘅情況下突然派戰機轟炸伊朗，基本上係開戰行為，而且亦冇得到國內例如國會等授權，喺美國空襲伊朗嘅核設施後，美國獨立派參議員桑德斯（Bernie Sanders）喺同一日，參加集會時就狠批特朗普嘅空襲行為「嚴重違憲」，直指總統無權宣戰，因為宣戰權力屬於美國國會。
唔計其他黨派嘅人，其實共和黨內部都有反對聲音，例如共和黨籍肯塔基州眾議員馬熙（Thomas Massie）就係其中一位，佢喺社交媒平台都話，美方對伊朗行動係「違反憲法」。綜合唔同消息，其實特朗普嘅開戰行為，即使喺佢嘅 MAGA（Make America Great Again）陣營，都有人不滿特朗普，有MAGA支持者更直指，特朗普違反咗之前「不捲入海外衝突」承諾。
有一個故事，就係一位特朗普「鐵粉」，話自己喺特朗普選舉時，自己跑勻全國幫特朗普助選，但依家隔幾個月，美國就捲入外國戰爭、政權更迭同「以伊大戰」。至於美國民主黨，更有人提出戰爭權力法案，希望約束總統對外動用軍事力量，聲明指絕不能允許特朗普在未經國會批准情況下，對伊朗或任何國家開戰。特朗普喺今年1月20日宣誓就任美國總統，到依家大約5個月時間，就可以搞到美國甚至世界咁亂，佢做多一年半載，美國同世界會變成點？
從個人層面睇，特朗普係失敗嘅，佢要處理國內移民，結果變成全國各地嘅示威衝突；佢要查留學生資料，變咗連大學都要反抗佢；佢要平息俄烏衝突，結果兩邊打得仲盡咗；到佢要處理中東問題，結果自己炸埋伊朗一份。如果話佢嘅MAGA陣營唔滿意佢，呢個講法已經相當客氣，因為真實係「全世界都不滿佢」，當初投票送佢入白宮嘅人，情何以堪？
讀者睇返我第一段引用嘅特朗普說話，再睇下各項事實，有一個好悲慘嘅地方，就係喺西方社會有「民主選舉」，但選舉前政客開出「幾百張支票」（即作出承諾），結束戰爭好，解決國內問題也好，結果呢？結果就係政客上台後，原來問題無解決，反而仲嚴重咗，特朗普依家嘅情況，一句講晒就係亂嚟，什麼讓美國再次強大（Make America Great Again）？由各種情況觀察，美國已經開始衰敗，而呢個終結者，就係美國人自己選出嚟嘅特朗普先生。
收藏
取消收藏
分享
