【點新聞報道】中東局勢緊張，令不少計劃暑假返港的移英港人頭痕，因為不少人為慳錢會選擇在多哈機轉，而非直航航班。一名移英港人在網上發帖大呻，中東嗰邊打緊仗，但機票已經買咗，如果而家取消，每位要畀三千幾蚊港紙取消費。他更大嘆「唉，生活艱難」，不想再畀錢，重新買過機票。
該名移英港人在fb群組「英國香港人生活交流區」發文表示，由於屋企有白事儀式要處理，所以要返香港一趙，「原本打算九月底到十月返香港，大約留三星期，機票已經買咗，要經多哈轉機，如果而家取消，每位要畀三千幾蚊港紙取消費（當然，如果真係要取消都冇辦法啦）」。
樓主大呻，「而家中東嗰邊打緊仗，我都有啲擔心，始終一家大細咁出門，個心唔多唔少有啲唔安樂」。雖然知道其實可以揀經荷蘭，巴黎之類飛返香港，但樓主表示如非必要也不想再畀錢，重新買過機票，大嘆「唉，生活艱難」。樓主亦不禁問網民「我係咪諗多咗，杞人憂天呢？」
帖文引出同病相憐的移英網民留言，「我星期四返香港，多哈轉機，現在都唔知點算」、「Me too我星期三飛都係多哈，而家同你嘅感受一樣」。有網民就留言勸說，「安全最重要，我會選擇直航，不會在多哈轉機」、「觀望住先，而家周圍立立亂，到時都唔知邊度危險過邊度」。
有網民認為不用太擔心，「正常航空公司都唔會搵人命較飛，但係自己都做好兩手準備，你覺得錢緊要定係命緊要？」「危險嘅話，飛機都唔會飛嗰頭，一架飛機好貴㗎！仲有成3個月，世事難料，到時再算」、「睇定啲先，如果佢飛唔到，佢一定有option比你refund」。
收藏
取消收藏
分享
稿件由上傳 · 文責自負 · 不代表本網立場
