【點新聞報道】關智斌（Kenny）全新廣東作品《永遠的彼得潘》上架，新歌講述雖然世界是大人遊戲，但心裏仍然是昨日那位小孩，保有一顆童心。
Kenny透露歌曲靈感來自一篇關於「彼得潘症候群」的報道：「形容有啲出咗嚟社會做嘢嘅人、成長咗嘅人，其實佢哋唔想長大，想繼續過返以前細路仔嘅生活。」他笑言想證實自己是否都患上此症：「因為好多人都會話我個樣或者我嘅人生處事態度，好多時都好似個小朋友咁樣。」隨後他感觸起來又言：「其實每個人心裏面都住了個理想嘅自己，只係被現實磨平咗。」
被問到是否「長不大男孩」，Kenny直認不諱，「都係，最初冇呢個『覺悟』，但當我發現身邊朋友進入人生另一個階段，好似結婚生仔，我先發現自己從來冇跟社會嘅人生時間表。」「學習」是Kenny最保留到童真的一面，「我會突然想學新語言、玩攀石，最近仲研究緊設計自己嘅公仔同動畫人物，睇吓有冇機會推出。我又發覺我每去一個地方都會特登搵嗰個地方嘅雪糕去食，我諗呢個係最保留到我小孩嘅感覺。」
Kenny想新歌MV構思有五至六個角色，結果被導演麥曦茵「撳住」：「最後係三個唔同社會階層角色-上班族、垃圾房推車嘅工友同外賣嘅哥哥。最得意飾演小飛俠的童星，由朝早拍到夜晚都冇扭計，仲成日整蠱我哋。」
Kenny希望透過歌曲提醒大家：「就算世界幾現實，都要記住心裏面個Peter Pan！」
（點新聞特約記者陳惠芳報道）
收藏
取消收藏
分享
稿件由上傳 · 文責自負 · 不代表本網立場
