【點新聞報道】有顧客不滿收銀員拒收貼有膠紙的50元，將對方放上網公審，話「真係唔知原來而家啲收銀權力大到有權揀錢嚟收」，批評是趕客的行為。不過就圍爐失敗，網民一面倒撐收銀員有權不收。
有網民在fb群組「西店Hi客之道」投稿並附上圖片，帖子題為「50蚊紙有咩錯」，指出「買嘢嗰陣時俾50蚊紙找數點知店員好串咁話唔收。我：吓，點解唔收？金毛仔收銀：你用膠紙貼過我哋係唔會收嘅。 我：呢張又唔係假銀紙，你拎去照下咪知係咪真囉。 金毛仔收銀：總之唔收，你俾過第二張我。」樓主拒絕收銀員的要求，「咁我咪唯有唔買囉，真係唔知原來而家啲收銀權力大到有權揀錢嚟收，所以唔好話冇生意，一切都係自己做成，請埋呢啲冇家教嘅𡃁仔又唔做培訓，淨係識得趕客，想人留喺香港都難啦」。
事件引爆網民熱議，不少網民都撐收銀員有權不收，「人哋又真係有權唔收損壞的貨幣」、「個店員有冇家教我唔知，我淨係覺得冇家教嘅人係你」、「咪唔好買囉，無人逼你買㗎喎！」、「損壞咗嘅紙幣係可以不被認可為法定貨幣，拒收好正常喎真心膠定扮㗎」、「自己冇認知怪人哋唔收！」、「做收銀都要同老細交代㗎」、「收銀冇問題！ 你自己反思下啦。」
根據香港金融管理局的網頁指出，損壞的紙幣有可能不被接受做法定貨幣。如果紙幣撕爛可以拿去發鈔銀行換，銀行會按既定準則驗證鈔票真偽及損毁程度，例如會驗是否真鈔、防偽特徵是否完整、損毁程度等。一般來說，如果沒有以上問題，銀行會換錢給市民。
至於紙幣可否黐返埋使用？金管局指最好是交回發鈔銀行，並提醒切勿將兩張不同號碼的鈔票黐在一起，這樣做是合成銀紙，不是法定貨幣，可能會被檢控製造偽幣。
至於如果收到張霉霉爛爛的銀紙，可以怎辦？金管局指出崩角、污糟銀紙仍然用得，但如果覺得不順眼，最好是交予發鈔銀行回收。一般來說，銀行會驗證銀紙是否真鈔、損毁面積有否超過四分之一、防偽特徵是否完整，如無以上問題可兌回錢。
收藏
取消收藏
分享
