文/稀思路
所謂江山易改，品性難移，筆者成日覺得一個人嘅性格，尤其係成年以後，要改變係非常困難嘅，例如盲反特區政府同中央嘅人，就算外國幾差幾亂、中國幾好幾強，佢哋都係會覺得「世上只有西方好」；同理，一向玩「偷呃拐騙」嘅人，就算點樣扮好人同扮正義，Sorry，其他人都會覺得佢係老千。稀思路講緊邊個？當然係再次涉嫌犯案嘅阮民安（Tommy仔）啦！
近日關於阮民安嘅新聞，可能讀者都睇過下，筆者再簡述下，事件就係18日下午，有警察執行任務時，發現一名男子形跡可疑，於是上前截查，發現佢有一袋來路不明嘅食物，身上又有其他人嘅信用卡，由於無付款紀錄，所以就以涉嫌「店舖盜竊」罪拘捕此人，呢個人就係阮民安喇。
畀人拉、畀人告（7月9日提堂），正常人都會低調、唔出聲，但阮民安就反其道而行，喺社交媒體話自己「放心，無穿無爛，噚晚早瞓仲瞓得都幾冧下」，又強調「記得拎單，14蚊好，140蚊好，1400蚊都好！原來有起事上嚟，單係咁重要」，然後又話張信用卡係朋友嘅，「講一億萬句唔好意思，因為要您夜嘛嘛親身過嚟差館幫我澄清返」、「下次大家漏底野唔好再叫我袋住先，可以好大鑊㗎！」
網民信唔信阮民安？讀者們如果睇睇網上新聞啲留言，就真係心領神會，例如有網民話「應承我 馬會見」(串佢呃錢去馬會賭)、「應該改口叫：應承我 記得拎單」，甚至係「應承我，洗定PAT PAT去坐監」，有啲好客觀嘅留言，話就算佢無攞單買嘢，應該超市可以即刻印返張單出嚟，到底實情係點，只要開始審訊，過程就會一清二楚，法庭不可能屈人，阮民安亦不可能一個大話講一世。
喺筆者睇呢單新聞時，有傳媒就好精簡地道出阮民安嘅違法黑歷史，2006年醉駕被罰款加停牌一年；2021年違反《預防及控制疾病(禁止群組聚集)規例》遭發告票；2023年就勁喇，因為涉嫌發嘲諷警員言論，並虛構「暴動少女」招募捐款，承認煽動及洗黑錢罪，被判囚26個月。2023年嘅case，最有趣係虛構完故事同籌完錢，據報有筆錢入咗馬會作「賭博之用」，今次阮民安例牌話自己無辜，有罪無罪由法庭去判，但社會有個共識，就係阮民信唔過。
其實喺反政府嘅「黃圈」，由2019年甚至追溯至2014年，「黃圈」就係有班人借政治「搵水」，眾籌嘅人唔止阮民安一個，涉及洗黑錢嘅其他個案亦都有，如果一班人真係純為理念或所謂民主，就唔應該有人借機呃錢、掠水。不過，呢個可能係「民主人士」嘅其中一個共性，因為就算係美國總統特朗普，都有發行特朗普幣（$Trump），一班崇洋嘅攬炒派人士，喺搵食方面都係跟美國學嘢啫。至於今次阮民安涉嫌盜竊，究竟佢有冇喺超市偷100多元嘅東西？筆者唔會信佢講咩，只會等睇法庭判咩！
收藏
取消收藏
分享
