文/稀思路
有一種「雙重標準」，一直存在喺唔同地方包括美國，就係好多人本身或者自己嘅祖上都係移民到依家定居嘅地方，但住耐咗之後，呢啲人明明本身係移民或移民後代，卻又義無反顧地去反對移民，將移民視為敵人，甚至要「除之而後快」。最近，筆者喺網上睇文章，見到一個美國總統特朗普「爺爺的故事」，原來特朗普爺爺來自德國，而且據報係逃過兵役，即係走難去美國嘅；如果按照特朗普邏輯，係咪佢嘅祖上，都係屬於不受歡迎而且要驅趕嘅移民？
早前特朗普會見德國總理默茨，平時嘅特朗普，慣於喺公開場合「突襲」其他國家嘅領導，烏克蘭總統澤連斯基、南非總統西里爾．拉馬福薩，基本上都中過伏；但默茨就醒喇，與其畀特朗普「突襲」，不如嚟過反客為主，先將特朗普一軍，於是同特朗普會面時，就攞出一張出生證明影印本，呢張身份證明，就係特朗普爺爺喺德國嘅出生證明。
呢份禮物嘅心思先唔講，原來特朗普祖先係德國農民，佢爺爺弗里德里克年輕時，就為咗逃避兵役，走咗去美國搵食，當時為免被針對，仲謊稱自己來自瑞典；憑住把握一次又一次機會，包括搞賭搞黃色事業，發咗達嘅弗里德里克就返德國，但因為德國政府翻出其逃避兵役嘅紀錄，於是德國都唔畀佢定居返喺德國，呢位特朗普爺爺，又再返去美國，特朗普嘅爸爸亦都係有生意頭腦嘅，所以特朗普從小開始，就已經係「富二代」、「富三代」。
講返德國總理默茨嘅心思，既有表面用意，又有深層意義，表面用意，當然係因為以特朗普性格，隨時喺公開場合搞其他國家領導，默茨一招先發制人，尷尬嘅就係特朗普本人，如果特朗普想發難，只要默茨講多少少特朗普爺爺嘅故事，特朗普都要即刻收聲啦。深層次意義，純粹筆者估計，特朗普自己都係移民/移民後代，憑什麼歧視或者趕絕移民呢？
當年特朗普爺爺隱瞞來歷，算唔算係非法移民或犯咗法，筆者唔肯定，但讀者們可以睇下美國歷史，美國之所以過去咁成功，四個字，就係「海納百川」，一個又一個移民或移民後代，喺美國追尋「美國夢」，亦成就咗全球最強大國家，講最新例子，世界首富馬斯克係移民，而屹立美國硅谷最耐嘅CEO黃仁勳，都係移民。如果冇咗移民嘅貢獻，美國只會更衰弱。
如果再睇深啲，特朗普帶領嘅美國，除咗喺內部挑起唔同矛盾，其實佢亦係破壞緊全球嘅合作體系，美國要保護其他國家，其實都係保護緊自己建立嘅世界體系、金融體系以至美元穩定；玩推倒重來係可以嘅，但最後而又最傷嘅，一定係美國自己。同美國做敵人危險，做佢盟友又致命，如果要揀一個大國做盟友，其實都係中國最好；中國和平發展、扶助他國，而且未試過出兵玩「顛覆別國政權」。筆者估計，喺關稅戰面向美國妥協嘅國家，最後會發現，原來係一場「明明白白的搶劫」。
收藏
取消收藏
分享
