文/稀思路
我哋成日講「香港精神」，到底咩係「香港精神」？如果你問正路啲又愛國愛港嘅人，通常都會答你，香港人精神，就係獅子山精神；如果你問一班有反政府傾向，又有啲崇洋媚外嘅人，可能就會答你「民主」、「自由」等等，但其實呢班人心底，最重要嘅「香港精神」，係「搵食精神」。喺生活同金錢面前，佢哋嘅理念，可以好假，最近，網上就有討論，話唔少人諗住喺英國攞到永久居留權同英國國籍後，好多用BNO「5+1」移居英國嘅人都會返香港搵食，聽到呢種消息，最直接諗法係班人都幾冇骨氣，但其實客觀啲諗，呢班「移英人士」講咁多嘢，最後都係想搵食啫。
可能因為成日覺得一班移英人士係「雙重標準」（例如喺英國唔會批評英國警察用力拘捕示威者），所以筆者都幾留意呢班人嘅動態。話說，最近就有移英港男喺社交平台發文，話身邊好多人開始喺英國住夠「5+1」，好多人諗住只要攞到永久居留權同英國國籍，只要香港情況冇大變化，就會回流香港。呢位樓主仲講，論物質富裕同生活方便程度，香港真係好過英國好多，有網民就回應，其實大把人喺英國「混時間」，拎完護照就會走。
如果客觀睇件事，最容易睇到嘅一個事實，就係移居英國生活，生活根本就不如香港，呢一點，只要係喺香港生活而又去過外國嘅人都會明白，生活質素、方便程度、天氣、食物、治安以及社交圈子等等，各方面喺香港生活都會好過英國；當讀者們睇到身邊有啲移居英國後，不斷喺社交平台出文嘅人，描繪到喺英國生活幾「簡單而美好」時，讀者們有冇諗過，其實佢哋生活根本就一啲都唔美好呢？
有人要回流香港，呢個係佢哋權利，筆者亦唔會反對，但一班當初誓神劈願唱衰香港，話要離開香港嘅人，返嚟會唔會好「衰仔」？當初佢哋唔係寧願要西方嘅所謂「民主、自由」，都要放棄香港嘅穩定同好生活？呢個世界，有樣嘢叫回力鏢，移英人士大力唱衰香港，結果原來去到外國先係「衰嘅生活」，當然，中間有一因素，係佢哋喺2019年時被政客洗腦，認為香港差咗，但事實證明，香港越嚟越好，就連之前唱衰香港嘅金融家羅奇，最近都修正佢嘅「香港玩完論」。
有一點非常重要，就係就算畀移英人士等到「5+1」夠期，都未必能夠順利攞到永久居留權，因為英國嘅《移民白皮書》要延長移民居留期，係有可能包括BNO「5+1」人士，如果政策係落實而又包括BNO「5+1」人士，可能就會變「10+1」，一啲移英人士今日生活都咬牙切齒，要等多5年，又係咩世界？真係好難估。
最近，網上有篇文章，話如果BNO「5+1」變成「10+1」，居留成本會大增，本身一家大小嘅簽證費用、醫療附加費都唔係細數目，住多五年，又要畀多十幾萬港元，而且匯款、稅制不再有利於BNO「5+1」人士，又係一筆支出；外加留喺英國「減人工」工作嘅機會成本，再留英國幾年，筆者覺得根本隨時係Total loss（輸晒）。若然有人真係要回流香港，筆者奉勸佢哋要改變心態，如果再用有色眼鏡睇香港以至中央，咁樣唔單止唔客觀，仲會令自己唔開心的，認真講，依家祖國發展咁好，仲以為西方國家領先、優越嘅想法，真係過晒時喇！
收藏
取消收藏
分享
