文/稀思路
香港國安法實施近五周年，這些年來，由政府到政界等，都苦口婆心同各界講，社會上仲有各種軟對抗行為，要防微杜漸，唔可以畀黑暴或攬炒行動死灰復燃，不過有部分人仍然不重視問題。10日，警務處國家安全處就提醒，一款名為「逆統戰：烽火」嘅流動應用程式以遊戲作為包裝，宣揚「台獨」、「港獨」等分裂國家主張，任何人明知而發布該程式或相關內容，有機會干犯香港國安法及《維護國家安全條例》。筆者想講，當手機遊戲都成為反中央工具，各界真係要小心提防。
根據警方國安處嘅講法，「逆統戰：烽火」以遊戲作為包裝推出，其目的為宣揚「台獨」、「港獨」等分裂國家主張，鼓吹「武裝革命」、推翻《中華人民共和國憲法》所確立的中華人民共和國根本制度，並意圖引起對中央政府及香港特別行政區政府嘅憎恨。警方發言人提醒，危害國家安全行為同活動係極嚴重罪行，警方有法必依、執法必嚴，會追究法律責任到底。市民切勿下載該應用程式或以任何方式資助相關開發商，若任何人已下載該應用程式，應立即刪除，切勿以身試法。
資深大律師湯家驊就指，有遊戲應用程式涉嫌違反香港國安法等，事件較為罕見，若有人利用遊戲宣揚或策劃「港獨」，而市民已下載或使用有關應用程式，有可能被視為參與有關非法行動，有機會干犯香港國安法。筆者將事情睇得簡單啲，有人借遊戲宣揚反中央兼「港獨」、「台獨」訊息，邊個參與佢哋嘅遊戲，好容易被當成其中一分子。
筆者呢兩日睇新聞、網上平台，有少數人對警方嘅提醒不以為然，甚至覺得係「打機啫」，筆者睇過相關遊戲介紹，入面提到唔同地方可以加入不同陣營包括反賊陣營，一齊「顛覆政權」。可能有人話，「遊戲啫！」，不過，如果讀者們睇下遊戲介紹嘅底部，仲好似有寫明「遊戲背景，皆非虛構。如有雷同，那就雷同」，將「顛覆政權」加上「遊戲背景，皆非虛構。如有雷同，那就雷同」，意思其實都幾明顯。
大約2020年10月，BBC中文網有篇報道，應該係講相同團隊嘅另一款遊戲，唔係手機遊戲而係卡類桌上遊戲，不知名嘅團隊發言人指出，遊戲係根據對現實政治觀察，再「將革命組織進行宣傳、籌款、培養人才、發展組織和武裝的過程表現出來」，仲稱其主要工作係聯絡境外「反共組織」，以及協助海外盟友推動宣傳與組織工作。睇到呢度，諗下相關團隊，再睇下佢哋點介紹自己嘅桌上遊戲或者手機遊戲，如果有人仲要話佢哋「只係遊戲」，係咪呃自己？
有時候，部分市民或者青年唔係想加入反政府陣營，有時可能係被利用、被洗腦都唔知，一啲流傳嘅視頻、文章、藝術作品以至遊戲，都可以係引人去反政府嘅方式；對於「逆統戰：烽火」以及製作團隊，其實就係借遊戲搞反中、搞顛覆，佢哋亦開宗明義遊戲背景唔係「虛構」。香港今日嘅穩定得來不易，社會唔可以再畀年輕人被教壞，更唔可以畀破壞社會安寧嘅事再度發生。
收藏
取消收藏
分享
