【點新聞報道】不少大好家庭因移民問題破裂，話說有港人移英家庭的人妻，不惜放棄婚姻要回流返港，人夫在英另結新歡，大灑金錢與對方搞採購生意，最終負債累累下，要四圍賖借度日，最近更情大變，疑神疑鬼地話驚個女畀啲英國人強姦，驚個仔返學畀人用刀插，其友人直言「怕佢未到5+1已經發生倫常慘劇」。
有移英港人在社交媒體上一個移英港人群組發帖，表示有一個相識家庭移英後，變得支離破碎，「以前住大埔中心，同一座識咗對夫婦佢哋有一對仔女，因鍾意利物浦，所以間唔中出嚟睇波。2019年修例風波，先知道原來嗰個老公勁黃，老婆因為屋企人在內地有生意，層樓仲要係老婆個名，老公喺佢老婆屋企人間公司做個普通文員，定期有糧出又唔憂柴憂米。」
樓主2021年與太太移民英國，該夫婦一直聯絡樓主問長問短、話想去曼徹斯特，最後2022年該夫婦決定移民，但不出三個月便鬧離婚，「老婆好似唔多情願，可能女家嗰邊俾壓力佢，不過最後全家都過咗嚟，佢老婆好似幫佢拎晒啲MPF，兩公婆幫仔女搵晒學校，佢老婆俾晒一年租，仲買咗架車，過咗三個月，仔女好鍾意英國，但佢老婆頂唔順，最後擺低咗200萬，自己返咗香港，仲話不如離婚，雖然老公唔想離婚但又堅持要留係英國，個老婆話每個月寄1500鎊俾佢地做生活費。」
樓主指，「因為老公無乜學歷，只可以係度做倉，初時感受到呢度自由嘅國度，同一對仔女都生活幾好。」不過，他原來做倉的時候識咗個華裔BC女人，過咗兩個月就冇無做倉，拎咗啲錢同個華裔女人搞採購生意，對方更搬埋入屋住。
樓主其後發現對方出現異常，還急需借錢周轉，「見佢FB開始奇奇怪怪，又話租緊嗰度有奇怪嘢，啲貓無拿拿嚇親彈起，又download啲apps話咩有個人型係牆角，仲俾幾千鎊買啲水晶係屋企擺」、「一個星期之後佢打電話嚟，問我借800鎊話架車撞花咗要賠錢俾人，仲話一個星期之後會還，我見有筆錢定期到咗諗住幫吓人，不過一個星期之後，佢又話屋主追佢交租，因為生意周轉唔切，問我借2000鎊，仲話兩個星期之後連本帶利一次過還，又話兩個仔女無屋住要瞓街好慘」，樓主見離鄉別井一場街坊幫到就幫啦。
然而，兩星期後，樓主得悉對方原來爭落一身街數，「佢老婆whatsapp我叫我唔好借錢俾佢老公，佢老公周圍問人借錢已經爭落一身街數。咁我即刻問佢老公有無得還之前借咗嗰啲，佢話仲想再借多1500鎊，當然我呢鋪就唔再借啦」，對方即刻反指係「佢老婆周圍唱衰佢，等佢無錢全家訓街，又話唔會再俾每個月生活費」。不過，事實是「係街坊谷漸漸有人講話借咗錢俾佢」。
之後，樓主已經開始疏遠對方，「見佢FB開始一日到黑係度詛咒佢老婆」、「見佢FB又開始性情大變，可能見到英國近牌治安好差，就話英國好危險，又驚個女俾啲英國人強姦，驚個仔返學俾人用刀插，總之英國有乜唔好就一日到黑鬧鬧鬧，我怕佢未到5+1已經發生倫常慘劇」、「佢可能唔想返香港驚俾人拉，但一身街數留係度應該連入借嘅錢都無」。
收藏
取消收藏
分享
