文/稀思路
如果筆者冇記錯，計埋呢篇文章，應該係連續第三篇文章講到英國發生嘅連場暴動，點解要寫第三次？因為重要嘅要「講三次」？都唔係嘅，但講到英國暴動，筆者一定要寫文提起兩個人，一個係香港「末代港督」彭定康，一個係潛逃到英國但仍然成日抹黑香港嘅羅冠聰，呢兩個人經常對香港事務指手畫腳，擺明支持香港黑暴，依家英國有示威喎，為「本土權益」出嚟反政府，佢哋係咪要出聲，係咪要出嚟「譴責」英國政府強力執法呢？一班剩係識抹黑香港嘅政棍，依家啞咗？
老實講，筆者確實係比較關注彭同羅嘅動向，英國發生咁嚴重嘅反移民示威，呢兩個人咁鍾意「關心時政」，係咪要出嚟講下嘢，例如叫政府同示威者「坐低傾」，或者「支持」下啲示威者呢？筆者唔覺有，先講彭定康，筆者呢兩日特意「谷歌」搜尋下彭定康，唔算好仔細，見到佢又出嚟為禍港之首黎智英發聲，抹黑香港法庭「不公地」處理黎智英等人嘅示威案件，但一直搜落去，唔多覺佢有評論以至批評英國政府處理喺英國嘅示威，如果佢係咁正義，做乜唔企出嚟？即係佢嗰把「正義之尺」，剩係攞嚟「量度」香港？
至於羅冠聰，嘩，十分溫馨，喺佢Facebook最新一個Post，係將自己同伴侶嘅合照Post出嚟，話自己同伴侶要「好好地向前邁進，往更高更遠的風景出發」，又話喺困難嘅時間，有伴侶喺身邊支持佢，好浪漫咁話「對未來的共同追求，正是我們走在一起的原因吧」；兒女私情，幾時都係重要嘅，但羅冠聰打埋算盤都係個「英國人」，點解英國警察咁強力執法，唔見佢出聲？之前喺香港，佢反政府時明明行得好前喎！
其實，彭定康好，羅冠聰也好，根本就係雙重標準，對於香港嘅事，明明香港警察係止暴制亂，但就畀佢哋抹黑；到英國有暴動喇，英國警方執法更強力，英國法庭「更賣力」，但兩個人（其他政客都係差唔多），點解唔行出嚟批評、攻擊英國政府？喺香港暴動就係爭取「民主」，喺英國暴動就係「錯晒」？筆者同意任何地方嘅執法部門都要維持秩序，反對嘅係彭定康以至羅冠聰等人嘅雙重標準！
呢兩日睇報紙，仲有傳媒揭露英國另一種雙標，就係差別對待極右分子同穆斯林移民。對前者，明明係暴徒級別，甚至直迫恐襲級別，但英國政府以至政客，都只係將極右暴力歸類為「純粹的暴力事件」；但對於伊斯蘭分子類似嘅行為，就會好快貼上恐怖主義嘅標籤。筆者就覺得，呢種雙重標準以至差別對待嘅標籤，唔係解決問題，而係將不同族群嘅仇恨繼續加深，當英國極右勢力繼續抬頭，少數族裔繼續被邊緣化、打壓同打擊，最可能出現嘅結果，就係雙方衝突加劇，暴力再加劇。英國內耗又內鬥，喺英國嘅香港移民，亦唔能避免要捲入漩渦，只能自求多福。
收藏
取消收藏
分享
