稀思路/筆是機場
喺唔同嘅文章，筆者一早已經寫過，一班移居海外嘅黃絲、攬炒派，佢哋喺香港「以為」自己好惡，但係當佢哋去到外國，大家會發現佢哋「純過綿羊」，有啲人去到外國唔敢發惡，有啲人去到外國發唔到惡。日前財經事務及庫務局局長許正宇喺英國出席一場論壇，點知有示威者嘗試截車示威，最離奇嘅係，截車嘅香港示威者或者移英黃絲，竟然畀英國本土人制止番轉頭，即係移英黃絲或者黑暴分子，佢嗰套示威或者搞事方式，去到英國呢種「民主國家」，都唔係太受歡迎囉！
根據報道，當香港示威者想阻截許正宇坐駕嘅時候，一名身穿西裝嘅外籍男子就衝向示威者將佢撲倒，該名外籍男子後來喺馬路揮動雨傘，仲疑似擊中示威者頭部；之後，外籍男子走咗入隔離嘅大廈入面，有示威者想追但就被大廈保安阻止進入。喺呢件事，雖然有人聲稱自己受傷，但當地警方就表示事件中無人受傷，亦無拘捕任何人。
成件事非常簡單，就係一向自以為好出位嘅「香港示威者」或者移英黃絲，以為自己嘅行為好型、好有意思，結果人在他鄉，佢哋嘅做法，就引起英國其他市民嘅反感，甚至出手制止佢哋。從新聞訊息，我哋仲可以睇到英國警方嘅處理手法，基本上都係完全忽略呢班人，所以當有人話自己示威被人弄傷嘅時候，英國警方就話畀大家聽「無人受傷，無拉到任何人」。
由於事件勾起咗筆者嘅好奇心，所以筆者就去唔同嘅新聞網站睇多啲詳情，喺一個外媒網站，就話示威嘅組織係一個「政治犯關注組」組織，佢哋批評英國唔應該畀許正宇到英國出席活動，又攻擊香港特區政府「摧毀香港自由」，有人甚至揚言「我們要跟當地英國人說，請你停止與香港和中國做貿易」；而有出席示威、曾被香港拒絕入境嘅「香港監察」行政總裁羅傑斯就聲稱英國畀許正宇入境「十分荒謬」，又話許正宇嘅部門禁止移英香港人取回強積金，英國政府應該對佢以及有強積金業務嘅英國銀行施壓。
正當示威者以至「香港監察」大聲疾呼嘅時候，其實佢哋嘅訊息反而係話畀我哋聽，上至英國政府高層，下至執法嘅警察，都好似唔係好理佢哋；而許正宇去英國交流而暢通無阻，亦可以佐證一點，就係不論移英黃絲如何地抹黑，英國至少係倫敦方面，政府都明白要「停止與香港和中國做貿易」或者停止交流，係唔現實嘅事。最近法國總統馬克龍已經訪華，其他歐洲國家就算唔係跟到足，應該都唔會同中國交惡。
依家全球政治經濟局勢不穩，歐洲各國更深陷能源、通脹以至失業等危機，被喻為「老大哥」嘅美國唔係好幫到佢哋，一眾歐洲國家要尋求可靠嘅合作夥伴，中國係最好嘅選擇。一班移英黃絲或者「香港示威者」，以為自己夠惡、夠大聲，Sorry，英國有市民挺身而出反對佢哋搞事，英國警察無理佢哋，甚至大廈保安都唔畀佢哋入內滋事。有時呢，世上總會有啲人係令人討厭嘅，但如果一啲「香港示威者」連自己令人生厭都不自知，仲喺度周圍做政治騷，咁就唔係幾好喇。最後講多兩句，呢種喺香港作威作福，去到外國猶如「綿羊」嘅人，佢哋去到外國都「唔夠自由」喎，係咪又要準備移民喇？
收藏
取消收藏
分享
