點新聞 | 每日點新聞 點解香港事

每日點新聞 點解香港事
下載APP
標籤

綠葉的辛酸 譚俊彥帶淚圓戴耀明母子願

戴耀明驚訝好友的心意。

林盛斌主持無綫節目《360秒人生課堂》,昨晚(21日)嘉賓是「綠葉王」戴耀明,透過節目向一直默默耕耘的綠葉演員們致敬。

戴耀明以搞笑方式道出綠葉之苦,上台即暢談「別人硬係叫唔出佢個名」的種種經驗。出身草根家庭的戴耀明多「做番自己」飾演基層,直到2010年,戴耀明抓緊演藝生涯中首個良機,憑《鐵馬尋橋》的「義氣排長」一角突圍,感動觀眾。眼淚背後另藏心酸,他說:「11年前我爸過身,當時我懷疑自己情緒有問題,咁啱TVB搵我做《鐵馬》,劇入面有大量喊戲,嗰時話喊就喊,我開始諗,原來做演員係需要有經歷,但好坦白講,我爸過身呢種經歷,如果可以畀我重頭揀,我寧願冇。」

戴耀明道盡綠葉辛酸。

戴耀明談到年逾80歲的母親,在戴耀明眼中「戇居居+天真無邪」的戴媽媽,近年不斷向他催婚。戴耀明引述媽媽說:「第時唔覺意你媽兩腳一伸,你又唔覺意喺TVB攞咗個咩獎,咁你番到屋企拎住個獎戇居居,咪冇人同你分享。你阿媽頂晒櫳變隻飛蛾對你笑一笑,到時你都唔鬼知啦。」戴媽媽希望阿仔有天能吐氣揚眉,戴耀明坦言最慚愧的不是還未吐氣揚眉,而是竟連媽媽「電視城一日遊」的心願仍尚未實踐:「我撈咗幾廿年,連帶我媽番電視城參觀都未試過。」

譚俊彥帶戴母遊電視城。

為圓戴耀明母子心願,節目台前幕後,以及戴耀明好友譚俊彥早有準備。戴耀明錄影當日,譚俊彥悄悄帶戴媽媽參觀電視城,更於古裝街向戴媽媽大談戴耀明拍劇點滴,過程中還不忘表達對好友的感激。譚俊彥說:「我嗰時啱啱嚟TVB,個個都唔識,佢成日照顧我,最緊要大家照顧大家。」之後譚俊彥與戴媽媽坐在後台欣賞戴耀明演講,譚俊彥為好友流淚,場面感人。

戴耀明擁抱譚俊彥表感謝。

戴媽媽上台後,談到阿仔的演出,戴媽媽笑言有時都「冇眼睇」:「有陣時唔係好想睇,尤其做衰仔嗰陣!(佢做戲點?)佢扮啲衰嘢就似咯,好嘢就好少,希望無綫監製畀啲好角色佢做,唔好淨係影佢打劫呀,點樣做壞人。」戴媽媽坦言兒子捱了多年,最大心願是兒子能夠獲得肯定:「攞咩獎都是但啦,有獎攞就得,唔好咁強求呀,佢個樣又咁醜樣,講老實話吖嘛。」

(點新聞記者陳惠芳報道)

收藏收藏
取消收藏取消收藏
稿件由上傳 · 文責自負 · 不代表本網立場

綠葉的辛酸 譚俊彥帶淚圓戴耀明母子願

收藏收藏
取消收藏取消收藏
稿件由上傳 · 文責自負 · 不代表本網立場
相關推薦