筆是機場｜在黃仁勳事件　我們看到什麼？

文/稀思路

近期，英偉達總裁黃仁勳「出軌」一事，喺全球鬧到沸沸揚揚，黃仁勳更要主動辭職，大部分人食花生睇戲，部分人藉機針對中國，個別人士根本就係想搞死黃仁勳。美國富豪「出軌」，對大眾嚟講可以話係毫不意外，但係點解偏偏係黃仁勳，個勢就似要畀人針對至死呢？稀思路覺得，當中有三組關鍵字：華人、特朗普以及芯片。

要講美國富豪風流史，可能用兩篇文章都講唔晒，筆者就講兩個較為出名嘅例子，第一個係馬斯克，呢位全球首富，有人戲言佢有幾多情人、生咗幾多仔女，可能外界冇人數得清楚，甚至當佢嘅桃色新聞成為熱搜，佢都一樣冇事；第二個就係曾經嘅世界首富比爾蓋茨，創辦世界級企業微軟嘅佢，比馬斯克更進一步，涉及淫媒愛潑斯坦嘅性醜聞，但讀者們睇下，比爾蓋茨直到今日依然完好無缺。

咁點解「老黃」（黃仁勳）會咁大件事？當中主要原因，係因為佢係華人，華人喺美國可以實現美國夢，但本身嘅華人身份，再加上背後政治力量不足，有起事上嚟，當然係一沉百踏踩；加上「出軌」對象亦係華人，喺美國政商界，自然會有鷹派大做文章，將「老黃」講到背叛美國咁。

如果認真睇今次事件，其實黃仁勳可能只係「代罪羔羊」，因為特朗普同美國民主黨嘅其中一個爭議位，就係特朗普認為「AI發展不能停」，但民主黨除咗想剎停人工智能發展，仲想叫停唔同州份嘅數據中心建設；依家黃仁勳呢個華人，有個華人「出軌」對象，咁就直接扣上「間諜帽子」，嚟一招「打黃仁勳即係打特朗普」，所以今次攻擊黃仁勳嘅攻勢特別猛，當中原因，都針對住特朗普同佢嘅AI政策。

回到黃仁勳本人，無論係AI界定係電子遊戲界，都知道英偉達嘅芯片係訓練AI或者進行高質素遊戲嘅必備工具，英偉達作為喺芯片市場有近乎壟斷地位嘅企業，黃仁勳理性地認為美國應該向中國輸出芯片，唔好放棄中國市場，自然會受到美國對華強硬派嘅針對。但睇返轉頭，黃仁勳嘅思路係有佢道理，中國一直用美國芯片，美國就繼續賺錢；中國自行開發，反而美國優勢相對會收窄。

綜合「華人」、「特朗普」同「芯片」三大因素，再睇美國依家嘅議會、傳媒論述，黃仁勳喺英偉達嘅事業，已經肯定要中斷，雖然餘生仲係一個大富翁，但喺美國政壇、科技界難以再發揮到影響力。換個角度，如果黃仁勳係白人，可能成件事已經好唔同，所以單純地睇「出軌」，只怕唔會睇到發生咩事，結合埋特朗普同AI生態，事情就十分清晰喇。

喺呢件事上，藉機會抹黑中國嘅人實在太多，但筆者借用外交部發言人郭嘉昆嘅講法，所謂中國間諜嘅論調純屬係捕風捉影，污衊抹黑。除咗中國外交部發言人嘅回應，筆者會諗，如果真係有間諜，點會畀外界喺公開場合咁輕易見到？當睇下美國政治環境、黃仁勳嘅處境，再加上明顯得誇張嘅「間諜指控」，筆者甚至覺得，今次黃仁勳，算係因為出軌而「被劫了」。