筆是機場｜又干預黃之鋒案　「十國聲明」十分可恥

文/稀思路

前「香港眾志」秘書長黃之鋒，因為觸犯香港國安法下「串謀勾結外國或者境外勢力危害國家安全罪」，日前被法院判監十年，各界都認為，黃之鋒所犯罪行嚴重，罪有應得，理當受罰。然而，總有外國勢力死心不息，誓要不當干預黃之鋒案，例如美國、英國、法國、德國、日本、意大利、澳洲、加拿大、荷蘭及新西蘭十國政府，就着黃之鋒案發表所謂「聯合聲明」，刻意扭曲事實、抹黑特區政府。筆者嘅問題好簡單，黃之鋒所犯罪行，即使喺外國都係不可接受嘅罪行，點解犯罪行為發生喺香港，外國勢力卻敢叫特區政府「放人」呢？

根據報道，美國、英國、法國、德國、澳洲等十國外交部，喺所謂「聯合聲明」抹黑香港國安法，仲將幾個月前嘅「支聯會案」拉埋一齊講，要求停止香港國安法對唔同人士嘅起訴，又攞埋《中英聯合聲明》出嚟講，要求特區政府「尊重自由」。然而，所謂「十國聲明」，法理上站得住腳咩？

無論係黃之鋒案定係「支聯會案」，案情不同，核心邏輯都係一樣，就係危害國家安全！喺黃之鋒案，黃之鋒自己都承認控罪，控罪指黃之鋒喺香港國安法生效後，仍然有要求外國制裁特區政府、官員嘅行為，即係叫外國「搞香港」！至於「支聯會」，多年以來，十分清晰，就係想顛覆國家政權。當有人嘅行為明顯針對、想推倒特區政府甚至中央，筆者敢問外國勢力，呢啲行為喺西方國家係容許的嗎？

外國勢力成日講「表達自由」、「和平集會」，但筆者肯定，當罪犯行為涉及勾結外國勢力加上要推倒政府，已經完全超出「自由」、「表達意見」嘅範疇。睇返黃之鋒多年嘅行為，由反對國民教育開始，到違法「佔中」，再到黑暴運動，都係存心同政府、中央對着幹嘅反動分子，如果黃之鋒喺外國，一樣會坐監，而且年期唔會輕。

近日，亦有傳媒報道指出，美西方嘅維護國家安全法律，更多又更嚴厲，例如喺美國，最少有21部維護國家安全相關法律，不止涵蓋叛國、間諜活動、恐怖主義等行為，更擴展到經濟、軍事、教育等層面。至於「崇洋分子最愛」嘅英國，至少有14部國安相關法律，2023年7月通過嘅最新《國家安全法》，首度列明外國干預罪為刑事罪。過去20多年，計埋新嘅國安法案，英國至少已經十次修訂或頒布涉及國家安全嘅法律。

大家經常指出，美西方國家雙重標準，如果黃之鋒喺美、英等國，會唔會因為「表達自由」而不被控？相信不可能，外國勢力不斷干預黃之鋒、黎智英甚至「支聯會」案件等，佢哋唔係要保護黃之鋒等人，其實只係想借機會攻擊中國， 而黃之鋒就成為佢哋嘅爛頭卒。

黑暴運動失敗收場，黎智英、黃之鋒等人要接受法律制裁，美西方國家「扮正義」，表面為黃之鋒佢哋發聲，實際上黃之鋒等國安重犯，只係被遺棄嘅棋子。搞唔到中國同香港，外國勢力可以「發聲」支持下黃之鋒等人，但外國政客始終如常生活，繼續搵其他反華棋子；黃之鋒等人，就只好適應獄中生活，幫手為外國勢力「埋單」。