筆是機場｜BNO移英居住年期不改？魔鬼還在細節中！

文/稀思路

之前，稀思路不時會寫一個題目，就係移英港人狀況，包括就業、學業以至定居嘅問題，英國當局一直想改革移民制度，BNO持有人移英，到底係要等5年，定係等10年甚至15年？呢個答案近日就開估喇，當有移英人士可能要等上10年甚至更長時間，BNO持有者應該可以維持定居5年嘅時間。不過，正如筆者之前所講，英國政客邊有咁簡單，表面上優待BNO移英人士，實際係魔鬼在細節。

本月初，英國內政部公布名為「按貢獻獲取永居」（Earned Settlement）嘅移民制度，取消咗過去「住滿5年即可申請永居」嘅常規做法，內政大臣馬曼婷（Shabana Mahmood）就表示，新政策將永久居留權與個人嘅經濟及職業貢獻掛鉤。簡單嚟講，就係錢越搵得多，職業越係英國所需要，申請永久居民嘅居住年期就越短。

唔少人比較關心嘅係，咁用BNO移英嘅港人又點？根據英國官員嘅講法，BNO持有人維持五年嘅居住門檻，但須符合全新「強制性基本要求」，包括英語口語能力須達B2級別（相當於英國A-Level英語作為外語水平），但兒童、65歲或以上人士可獲豁免較高嘅英語門檻。

另外，仲有需要符合其他「加強版」條件，例如沒有任何刑事紀錄、沒有拖欠公帑或稅務款項，以及擁有持續繳交國民保險嘅紀錄。有關政策係有爭議，因為有人指出，英國政府官網，仲係話BNO持有人只需要英文達到B1水平。筆者想講，如果以英國官員說法為準，其實英國已經落咗兩道大閘。

要移英人士英文達到B2水平，相當於英國A-Level英語作為外語水平，呢度可能已經將一半或以上嘅BNO移英人士隔走，英國嘅政策，唔需要加長年期，都可以自動篩走啲人。另外，就係唔可以有刑事紀錄，其實之所以要去英國，部分人就係因為喺香港參與過黑暴，有刑事紀錄，假設當中又有部分人被篩走，即係英國政府可以「扮到」好照顧BNO移英人士，實則不動聲色，就將部分甚至大部分人隔絕。

筆者一直覺得，BNO「5+1」移英計劃，其實係一個政治產物，2019年黑暴運動時，英國同其他西方國家，擺出一副「支援香港示威」嘅姿態，推出BNO「5+1」計劃，之後有唔少聲音要求英國收緊移民政策；但係英國政客打晒開口牌要支持香港嘅反政府人士，今日嘅移民改革，英國就採取「聰明做法」，表面上BNO移英人士居住年期等不變，不過「其他要求」呢？似乎仍然要滿足。

環顧英國嘅歷史，先唔講佢嘅侵略史，其實讀者們可以睇下，英國喺唔同階段嘅策略，包括對外政策，講到底就係「着數」兩個字，佢哋表現到好關心香港，係因為香港有價值；今日調整移民政策，都係基於利益嘅考量，如果有移英港人已經全副身家搬晒去英國，但極可能達唔到英語水平等要求，可能就會total loss（全盤皆輸），筆者始終覺得，外國勢力嘅「好心」，其實都係基於計算。