筆是機場｜法國騷亂讓中國產品火熱起來

文/稀思路

最近關於歐洲各國嘅騷亂，有評論話喺歐洲嘅示威，頗有2019年香港黑暴運動嘅感覺，熟悉嘅打砸場面，熟悉嘅破壞手法；喺示威集中地嘅法國，有唔少示威者仲想打劫名店，不斷衝擊唔同嘅名店，但喺店舖當中，無論暴徒點衝擊路易威登（Louis Vuitton，下稱LV）門店，門店玻璃依然「沒有倒下」，相關片段喺網上火速流傳，法國有暴動，卻「紅了」好可能係中國製嘅玻璃，實在非常厲害。

根據外媒報道，事件發生喺10月17日，至少有六名蒙面示威者以道路圍欄等當係撞門工具，多次撞擊LV門店，用工具又出埋手腳，最終都係未能攻入LV門店。報道引述品牌店員指，店舖裝有特製櫥窗，當日成功抵擋衝擊，網上畫面就流傳，櫥窗遭撞擊後，留下大面積嘅網狀裂紋，但仍然牢固屹立，成功阻擋施襲者進入。

雖然唔係100%證實，但網上唔少報道都指出，LV所用嘅係中國特製玻璃，如果係真嘅，一場又一場法國騷亂，竟然令中國製產品爆紅，世事真係奇妙。事實上，經過多年努力，包括中央嘅規劃同帶領下，中國製產品已經走出低端嘅刻板印象，由玻璃、電子產品到機器人等，基本上製造水平都處喺世界頂尖水平，由當年輸入先進產品，到今日輸出先進產品，既有量變，更有質變。

講返法國，睇過去幾日新聞，示威看似係稍稍減弱，但以目前情況睇嚟，示威浪潮應該仲會斷斷續續，學生嘅訴求係大幅增加教育開支、資源，但法國政府根本做唔到，即係根源問題解決唔到；而且，示威已經變成學生以外、不同訴求嘅人都加入，原本一個校舍嘅問題，已經變成全國問題，法國呢個「大革命發源地」，可能仲有排「革命」。

近兩日，筆者仲睇到，原本喺法國、西班牙、葡萄牙、意大利等國家嘅示威，已經「成功傳遞」到德國，日前德國就有青年組織發起「Z世代話事」（Gen Z regelt），喺多個城市發起示威，法蘭克福、柏林等地都發生襲警同搶掠，多名警員受傷。一個簡單嘅觀察，就係原本喺法國嘅「美麗風景線」，好可能變成至少半個「歐洲嘅美麗風景線」。

無論係法國定德國，唔同嘅示威起因，其實都係指向同一件事，就係經濟同生活成本，筆者覺得，與其話歐洲過去十年八載唔爭氣，其實係歐洲過去幾十年都喺度食老本先真；更為致命嘅係，歐洲唔同國家經濟冇進步，但政客卻要開出「長期飯票」，令政府收入根本負擔唔起社會福利開支，上一代可能生活好啲，但新生代就要「找數」，咁嘅環境，歐洲各國青年就將怒火燃燒，出嚟激烈示威。

如果有留意國際財經新聞，歐洲起亂同時，其實都不忘針對中國，例如近期，有報道就話歐盟正醞釀措施，想喺短時間內擴大對中國商品嘅進口限制，以縮減以數千億歐元計算嘅對華貿易逆差。容許筆者講句，事實嘅另一面，係歐洲向中國買緊價廉物美又有質素保證嘅不同商品，如果歐盟真係咁做，可能會對自己經濟造成更大影響。面對內憂外患，包括盟友美國嘅針對，歐洲領導要諗清楚，同中國加強合作，更可能為發展謀到更好出路。西方國家要遏制東方國家嘅論述，喺呢個年代，應該好好放下喇。