（有片）海兒拍攝經典廣告歌　破格Opera演繹被讚勇敢

【點新聞報道】女高音歌唱家海兒（Hedy）日前拍攝廣告，破格以Opera美聲演繹家傳戶曉的《太陽出來了》，將廣告歌升格為歌劇級演出。她表示一收到story board即會心微笑，大讚客戶前衛又勇敢，從未想過有天可用鑽研十多二十年的聲樂唱廣告歌，十分開心。

海兒坦言演繹經典廣告歌「話冇壓力就呃人」，最有趣是跟團隊實驗美聲與流行曲的比例，最初錄音偏向Musical近pop，錄了兩小時後覺得不夠氣勢，最終客戶一句「去啦！100% Opera啦！」她便全力以赴，成就破格演出。

談到拍攝與正式演出哪樣挑戰更大，Hedy二話不說揀拍攝，笑言看Opera表演時pause片截圖「全部cap出嚟嘅相都係應該可以做meme嘅」，自己貪靚，要兼顧唱與表情管理，加上穿着絲質長裙晚裝，不可寒背或呼吸致腹部太脹，亦最擔心鏡頭低炒突出雙下巴，因最後會在觀眾大電視螢幕上出現4K close up。她又分享拍攝趣事，指廣告歌太入腦，拍攝現場不停Loop歌，無論走到邊都聽到有人唱，連髮型師都「中招」，食lunch時亦聽到有人哼歌，覺得十分有趣好笑。

（點新聞特約記者陳惠芳報道）