筆是機場｜香港沒有政治犯　但有國安犯

文/稀思路

由黑暴運動開始至今，其實已歷時有七年，呢幾年之間，我哋「重複、重複又重複」，都會聽到反對派陣營、外部勢力嘅一種謬論，就係暴動犯、國安犯等等，佢哋都會虛裝成為「政治犯」，然後無視香港反對派政客、暴徒嘅破壞，就抹黑係特區政府同警方唔啱，試圖將大話講100次變「真話」。最近，倫敦又有示威抗議，今次主題係「釋放李卓人」，而筆者又要不厭其煩地講多次，李卓人不是政治犯！

話說，英國公共服務工會同英國工會聯盟日前到香港駐倫敦經貿辦外抗議，聲稱要支援「香港民主及工會運動」，仲話要立即釋放「參與香港民主及工會運動」嘅「政治犯」，甚至話要廢除香港國安法。筆者睇到相關新聞，第一個反應，就係得個「哦」字。

類似嘅論調，或者直接啲講，類似嘅謬論，其實香港各界都聽過好多次，以今次李卓人為例，佢係純粹參與工會、「民主」運動而被判監嗎？答案唔係，李卓人被控嘅罪，係煽動顛覆國家政權罪，控罪嘅內容，係李卓人等人煽動其他人去顛覆中央，同工會運動冇關係；佢哋唔會因為「爭取民主」而被控，而係切實地違反咗維護國家安全嘅法律。

講到香港國安法，其實香港國安法嘅真正作用，係止暴制亂，防範同懲治危害國家安全嘅罪行，無論係黎智英、李卓人以至35+「顛覆案」嘅被告，佢哋嘅共同特點，就係對準特區政府甚至中央，想推倒特區政府。如果佢哋可以「民主自由之名」而免責，咁法治就會失去作用，政治口號更會淪為犯罪嘅擋箭牌。

睇下呢班人示威嘅地方——英國，一樣有維護國家安全嘅法律，而且亦有「外國干預」等相關罪行，如果一班政客喺英國危害國安，一樣會被告，仲可能會受到「快速」審訊。筆者會諗，如果香港唔係國安法及時制定同實施，黎智英、李卓人之流，可能會將香港搞到更亂，更多青年被推上街，亦會有更多人受到煽動同顛覆。

有時候反對派、外國勢力嘅謬論，就係一種「口號式」嘅反對，煽動顛覆、勾結外國勢力，佢哋話係爭取民主；煽動市民上街抗爭，佢哋話係表達、遊行自由。但當中嘅核心，始終係有人想破壞社會、推倒政府，如果反對派嘅邏輯係「啱」嘅，咁今日歐洲各國，唔應該控制示威集會，應該即刻向示威者「跪低」。筆者始終覺得，維護國家安全同社會穩定，係一個放諸四海皆準嘅道理，歐洲要止暴制亂，2020年嘅香港一定要，當外國政客、移英人士喺度扮正義時，佢哋試下喺英國搞事？可能過幾日就坐緊監喇！