筆是機場｜歐洲烽煙四起　西式民主「日落西山」？

文/稀思路

之前，歐洲受到夏天嘅熱浪衝擊，多人因為炎熱天氣而死亡。夏天遠去，秋天漸來，最近嘅歐洲，似乎比夏天「更為火辣」，由法國、西班牙開始，示威一場接一場，而且最新形勢睇嚟，示威浪潮有可能席捲整個歐洲，到底歐洲發生咩事？無論係法國嘅教育問題，西班牙嘅住屋問題，以至係比利時嘅生活成本問題等，稀思路一個小總結，其實底層原因，都係因為歐洲出現經濟、社會失衡。

較早出現示威浪潮嘅法國，一大班年輕人上街示威，係要抗議法國嘅教育問題，筆者初頭睇問題，以為係法國學生「每日上課時間太長」，所以忍唔住出嚟示威；事情一直發展落去，原來涉及法國嘅教育資源不足，校舍舊、缺教師，本來最應該投入資源嘅社會政策範疇，變成連基本投入都唔足夠。示威浪潮持續到近日，法國已經出現「打砸搶燒」嘅情況，仲有人去名店洗劫完，就喺街頭擺賣「名牌袋」，實在十分猖狂。

另一歐洲國家西班牙，就因為87歲婦人被加租、逼遷後身亡，西班牙甚至葡萄牙，近年都深受樓價、房租上升而困擾。另外喺比利時，一個向來被視為較為和平嘅國家，都出現反對生活成本過高嘅示威。如果簡單數一數，法國、西班牙、葡萄牙、意大利、比利時、阿爾巴尼亞等國家都相繼示威，一個十分直接嘅感覺，就係「歐洲病了」！

過去幾個世紀，歐洲都係全球經濟發展嘅火車頭，連同後起嘅美國，基本上已經雄霸世界幾百年，一個又一個先進嘅國家，點解會陷入動盪當中？唔同嘅分析，唔同嘅專家，可以得出唔同嘅原因，筆者睇基本點，其實就係經濟問題，如果經濟發展得好，唔會有教育資源不足嘅問題，亦唔需要怕青年失業，甚至喺房屋政策上，如果政府有錢都會容易處理啲。經濟搞唔掂，外來移民又多，結果就係本土居民加外來移民都生活唔好，青年上街「打砸搶燒」唔啱，歐洲政府點解決難題，又係另一個大挑戰。

歐洲嘅制度，由封建到西式民主，基本上喺佢哋崛起嘅過程，政客、學者吹噓咗幾百年「民主制度最好」，但如果西式民主已經唔能夠處理社會問題，又或者西式民主已經陷入多方對立，任何一個陣營都說服唔到對方或市民，咁發展落去，國家除咗分裂仲可以點？筆者甚至會諗，歐盟呢個共同體，到底仲能夠維持幾耐？

仲記得香港喺黑暴運動時，歐洲一啲國家領袖、政客，似乎都偏向「同情」示威者，甚至有份抹黑特區政府，依家「打砸搶燒」出現喺歐洲，我哋又要點評價？經歷過動盪，我哋唔想國家同香港亂，都唔會想其他國家亂，歐洲嘅問題，唔好話「積弱已久」，都至少係「積弊已久」，經濟、產業跟唔上時代，社會福利又想維持，始終都會爆煲。而當歐洲仲打算推出政策喺市場上排斥中國時，筆者喺度諗，喺同美國關係唔好嘅大前提下，歐洲針對中國，未必係明智之舉。國際合作之間，筆者始終相信可以合作共贏；零和博弈，只會令歐洲更傷。