筆是機場｜中期選舉或變「終期」 特朗普自己都擔心
文/稀思路
下月3日，就係美國中期選舉，近期外界都有唔少分析，包括看淡共和黨，認為之後總統特朗普施政會舉步維艱，一個較為鮮有嘅現象，就係向來自大嘅特朗普，似乎自己都對中期選舉嘅結果唔係好樂觀，承認共和黨要保住參、眾兩院控制權所面臨嘅挑戰艱巨，甚至直言「難度相當」。稀思路想講，今次中期選舉，可能係特朗普執政甚至人生嘅一個轉折點，一旦共和黨選舉失利，民主黨往後肯定咬住特朗普唔放。
面對傳媒，特朗普首先承認一個事實，就係根據過往歷史，在任總統所屬政黨通常都會喺中期選舉面對不利局面，但同時，佢又「堅稱」共和黨選民嘅熱情高漲。依家嘅情況，就係各方普遍預測共和黨喺眾議院形勢岌岌可危，而參議院呢，比較有利嘅選區格局，本身對共和黨保住控制權較有信心。
不過，如果民調、選舉預測機構嘅預計準確，民主黨贏得眾議院控制權嘅機會相當高；至於參議院，有機構認為最新情況都對民主黨較為有利，民主黨可能最終以些微優勢，連帶取得參議院嘅控制權。
之前筆者撰文時都指出過，喺美國呢個國家，經濟問題經常都係選舉成敗嘅主軸，向來自大嘅特朗普突然「不敢托大」，係因為眼前形勢對佢以至共和黨都相當不利。筆者日前睇到單新聞，指出汽油、柴油價格上升，已經將通脹推高至最新嘅3.7%，一個普通美國家庭，每月開支比三年前高出約600元美金，即係大約4700元港元，基層生活叫苦連天。當美國基層、中產連維持日常生活都出現困難，佢哋又點會投票比共和黨呢？
曾經，筆者睇過一條網上片段，有位美國民眾講得非常直白，特朗普嘅一系列行動，都想帶出「痛苦係暫時性，之後會好轉」嘅訊息，但特朗普政府一直安撫民眾，民眾嘅生活狀況卻越來越差，睇埋國際形勢，美伊戰爭到今日都未有完全停止嘅跡象，長此下去，唔通叫美國基層去「賣血」補助生計？用選票說話，可能就係美國民眾嘅應對策略。
從表面去睇，如果特朗普、共和黨選舉失利，往後特朗普可能係推唔到政策；但更值得留意嘅，係民主黨如果掌控兩院，會發動多次對特朗普嘅彈劾、調查，到時嘅特朗普，只怕唔止施政艱難，甚至會深陷危機。政治有時就係咁得意，政客採取一個動作，以為會為自己贏得一切；但係當採取行動後，例如係突襲伊朗，反而會令自己賠了夫人又折兵。美國嘅通脹危機，好難喺一時三刻扭轉，特朗普除咗打開口牌話「派錢」，仲有冇咩方法？距離投票日大約仲有半個月，讀者們可以邊食花生、邊睇特朗普表演。
