點新聞
每日點新聞 點解香港事
標籤

來論|邊反華邊搵食 佩洛西等美西政客夠無恥!

稀思路/筆是機場

政治嘅嘢,有時我哋從片面嘅現象,可能就可以睇到事情,不過,有時我哋表面睇嘅嘢,可能只係一個假象,就如香港會有人高調「聲稱」反國家,但佢哋最鍾意喺淘寶買嘢、用國貨;其實,周二晚上(8月2日)流竄台灣地區嘅美國眾議院院長佩洛西亦一樣,打從上世紀8、90年代開始,可以話係美國嘅「最反華分子」,由反對美國延長中國最惠國待遇,到香港特區嘅黑暴運動,都有佢嘅「黑影」;但事實又點會係大家睇得咁表面,噚日就有傳媒詳細報道,原來佩洛西或/與其家人投資多間企業,間接依靠中國嘅投資「賺大錢」,名符其實「講一套,做一套」,如果有人認為「反中」係佩洛西嘅終身事業,其實「搵食」,先係佩洛西同佢家人要做嘅事。

回顧返佩洛西多年嘅「反華生涯」,可以話係越走越激,甚至可以話係走火入魔。早喺1990年,佢已經嘗試發起國會反對老布殊(時任美國總統)延長中國最惠國待遇;1991年,美國眾議院又通過佩洛西提出嘅有條件延長美國對華貿易最惠國待遇議案,之後佢甚至聲稱過「中國在造成大規模殺傷性武器和生化武器的擴散」;到咗千禧年代,佩洛西就開始反對北京申辦2008年奧運會,直到中國成功申辦奧運會,佢嘅抹黑亦一直無停止過,去到2008年,喺北京奧運聖火傳遞期間,佢依然聲稱國際奧委會將2008年夏季奧運會舉辦權授予中國是「一個錯誤」,仲煽動對中國政府「公開表達自己的看法」。

佩洛西嘅「魔爪」,一直嘗試喺度干預、抹黑中國,到2019年,因為香港攬炒派反對《逃犯條例》修訂,到美國尋求「干預」,非常「好客」嘅佩洛西,就同赴美竄訪嘅黎智英、黃之鋒以及羅冠聰等政客會面;之後黑暴運動爆發,佩洛西更稱「那不是一道美麗的風景線嗎?」公然縱容香港嘅攬炒派政客同黑暴分子。總的來說,過去30多年,佩洛西「表面上」都係極強硬嘅反華派。

不過,佩洛西「表面上」反華,其實「賺錢」、「搵食」先係佢哋美國人嘅「核心價值」,有傳媒就踢爆,其實佩洛西或/與其家人借中國賺大錢,如佩洛西嘅丈夫保羅,就係專注投資亞洲地區包括「馬修斯國際資本管理公司」投資夥伴,投資額介乎500萬至2500萬美元(約3924萬至1.96億港元)。有公開資料顯示,佩洛西直到近年,依然喺有關公司持有「權益」。而佩洛西嘅兒子小保羅,近年有投資嘅兩間企業,都涉及中國相關嘅業務。即係話,佩洛西喺政壇上擺出反華姿態,增加自己嘅政治籌碼;而另一方面,佢以至佢嘅家人又直接或間接投資喺中國,真金白銀咁賺,真「識玩」。

佩洛西面做一套、底做一套,筆者覺得已經唔能夠用乞人憎去形容,因為佩洛西一家嘅做法,係連基本道德都無!如果係全心做反華政客,就唔應該借中國賺錢;相反,如果一心要賺中國錢,就唔好扮到自己好反華咁款。依家一個年過八旬嘅老婦,係都要流竄台灣,其實亦係一種「政治套利」,佩洛西唔係為台灣,而係為自己時日不多嘅政治前途打算。喺呢件事上,佩洛西要付出咩代價,尚未可知,但台灣地區嘅同胞,肯定要為此「埋單」。

事實上,佩洛西嘅作風,同美國政界嘅作風,都係一致嘅,以香港為例,美國一直支持黑暴運動,有人覺得佢哋單純想搞香港特區、中央政府?又錯喇,喺2010年至2019年間,美國對香港貨物嘅貿易順差,大約有3100億美元(無錯,係美元),單單計2019年亦超過260億美元,至少喺當時仲係美國貿易夥伴中最高。即係話,美國一方面有份搞亂香港特區,一方面又喺香港「發大財」,情況同佩洛西一樣,一邊搞中國,一邊家人又借中國賺錢。大家以為美國純粹反華,係大錯特錯,因為喺美國、美國政客眼中,仲有錢同生意。今次佩洛西竄訪台灣,亦係生意或者「搵食」,只不過,當佩洛西「搵到食」嘅時候,台灣地區同胞會唔會畀佢搞到「乞食」,就好難講喇!美國政客最叻,就係請客食飯,但「叫人找數」!

評論
相關新聞
相關度
相關度
從新到舊
從舊到新
搜全文 
全文
標題
關鍵字
goTop