稀思路/筆是機場
「我覺得呢個人相當有可疑」 ... 政客、評論員有好多種，但真正嘅評論員，到底係應該精準地分析到時局、預測到未來？定係「順住形勢做」，好似好專業獨到咁呢？筆者近期睇新聞，見到一篇關於中大學者、時事評論員蔡子強嘅專訪，一睇標題就相當吸引，寫住《民主運動不離妥協 「30年一事無成」錯誤認識累事》，蔡子強就講到過去十幾年香港政治生態由激進力量主導，未學懂「進退有道」，甚至錯誤地指控「民主運動三十年一事無成」，結果愈走愈激，一夕之間輸掉所有。就咁睇，蔡子強好似講得有啲道理喎，不如大家再聽下佢點講！
根據傳媒專訪，蔡子強喺訪問中提出咗一個「重要看法」，就係一啲年輕以往動輒指控老一輩民主派「30年民主運動一事無成」，這觀點絕對係錯誤嘅，必須平反；蔡子強仲話基於對過往民主運動成果嘅錯誤認識，導致一啲人「太過心雄」，在爭取民主嘅過程中不懂得知所進退、因時制宜，將運動推向極端，覆水難收。蔡子強一番說話，筆者接收到嘅訊息，大概就係話「如果你班人識玩，民主派就唔駛搞成咁啦！」
筆者做評論一向中肯，某程度上，筆者都幾同意蔡子強嘅一番話，香港回歸祖國以來，民主過程一直向前進，立法會議席一直增加，曾經通過政改方案；喺中央支持下，特區政府更提出過可以俾市民一人一票選特首嘅方案；不過，一班攬炒派政客「貪勝不知輸」，先搞擅擺明犯法嘅「佔中」行動，到2019年仲發起搞到香港立立亂嘅黑暴運動，之後？之後佢哋就「無之後」喇，中央果斷推出香港國安法，再完善選舉制度，所有非愛國者，唔需要再做議員喇！
以上呢一點，係蔡子強「說得對」嘅地方，但老實講，筆者絕不認為蔡子強係如此「眾人皆醉我獨醒」，上網搜尋下關於蔡子強嘅新聞，睇到2019年10月底，黃之鋒想參選區議會但被DQ後，蔡子強相信「事件對區議會選舉氣氛不會有大影響，但在國際方面會有迴響，可能有助推動美國國會通過《香港人權與民主法案》」；2019年11月25日，攬炒派喺區議會「有唔少進帳」，蔡子強就話「中央和特區政府一直未能有效回應民意，只是強調止暴制亂，造成市民逆反，令民主派取得歷史性大勝。他相信今次結果會令中央政府和建制派十分警惕，建制派可能會考慮轉變政治路線，爭取中間選民支持」；筆者想問一句，如果蔡子強咁「清醒」，點解當時唔指出攬炒派「只知結果，不知後果」呢？
睇返唔同嘅網上資料，蔡子強應該係反對暴徒衝擊立法會，甚或反對攬炒派總辭，但筆者嘅觀感，似乎蔡子強係偏向支持或同情黑暴運動嘅；佢依家批評啲年輕人「心雄」、不知進退好容易，但如果佢開初就不斷強調黑暴運動或者佢口中嘅反修例運動錯到離晒譜，咁筆者就真係相信佢有料喇！做事後孔明，你得，筆者得，人人都得，黑暴運動持續咗一年幾，蔡子強有冇一直同攬炒派講佢哋路線錯誤、行動錯誤以及完全錯判形勢，甚至係唔識歷史呢？
蔡子強自己都講，「一代人做一代事」，蔡子強呢一代人，佢哋做得正確嘅事，在於佢哋始終保持溫和；筆者覺得佢哋最錯嘅，就在於佢哋眼見整個攬炒陣營被激進勢力挾持，但依然欲拒還迎，一方面保持溫和，一方面又「開始偏向」激進派。今日整個攬炒派陣營攬炒自己，蔡子強可以話係激進派嘅錯，但蔡子強之流讀咁多政治、歷史，佢係咪可以經常、重複地話俾同路人聽，佢哋係「政治自殺」？諉過於人，總係容易，筆者反而想聽聽，蔡子強呢啲「冷氣軍師」，認為自己喺今日嘅局面上，到底有冇責任呢？
收藏
取消收藏
分享
