2019年8月18日,星期日
首頁 / 編輯推介 / 藉海麗罷工掠水 職工盟袋足七成

藉海麗罷工掠水 職工盟袋足七成

深水埗海麗邨外判清潔工早前發起罷工,最後睇落好似係大團圓結局,不過最開心嘅未必係一班工友,可能係「鼓勵」佢哋罷工嘅職工盟。喺今次事件入面,職工盟一句「支援海麗罷工」,咁就籌到逾28萬,不過其中得4萬幾成為「罷工津貼」,仲有23萬就留咗喺到,話要支援「日後其他工人抗爭」喎。市民捐錢,工友受惠三成都唔到,食水都真係幾深,唔少網民都質疑佢哋係咪落工友格、甚至攞嚟做選舉經費。職工盟就話,做法得到工友「一致同意」,而秘書長李卓人聲稱佢哋唔會用到當中嘅一毫子,如果將剩錢分返畀工友會好「奇怪」喎。不過,李卓人喺錢銀方面個底花過花士令,更加俾立法會查過,大家又信唔信佢同職工盟呢?

話說職工盟喺罷完工之後同傳媒講,佢哋為今次罷工籌得超過23.3萬,並已經向首批罷工嘅21個工友發放每人千八蚊嘅「津貼」,剩返嘅18萬就留返「日後其他工人抗爭」。咪住先,問過捐款者同意未啊?

市民促回水 職工盟懶理

姑勿論佢哋幾時又嚟多次罷工,明明籌款主題、信封抬頭都擺到明係「支援海麗罷工」,有剩錢咁樣扣起,似乎唔啱「專款專用」嘅規矩喎。好似facebook專頁「生於亂世」,喺前晚同噚日朝早連出兩個po(帖文),質疑職工盟嘅做法係咪落工友格。

佢哋話:「據職工盟回應是得到工人同意把18萬留起給另一場不知何時發生的工運,但理性分析的人會明白市民捐款的原意是捐給清潔工人,但結果變為政黨未來工運的經費!」佢哋仲話,有捐款市民不滿筆錢唔係用喺清潔工友嗰度,要求回水,但係職工盟睬佢哋都傻。

職工盟噚日晏晝發表聲明,話佢哋係透過本身個「勞工權益基金」支援今次罷工,並且喺元旦日開始發起公眾籌款,當日班工友已經知道並且同意每人每日有250蚊「罷工津貼」,有剩錢就撥返去「勞工權益基金」。

阿人話分返畀工友「好怪」

佢哋仲攤開條數嚟講,話元旦日到前日一共籌到28萬幾,今個月3號發放首批津貼畀21個工友一共35,000蚊,6號再畀第二批津貼一共12,700蚊,連同「其他旅遊巴及單張印刷等開支」就使咗55,000幾蚊,剩返23萬,全數撥捐「勞工權益基金」。

咁點解唔將23萬畀工友平分?李卓人回覆傳媒話,如果工友攞多佢哋「應得」嘅,就會令罷工係為咗籌款,而唔係同老闆去爭取,「咁就好奇怪」,仲叫大家唔好「侮辱」工友,另外每人每日250蚊「津貼」係等於佢哋日薪,「無畀多無畀少。」

「本土」來抽水 勿忘「袋住先」

素來同「本土派」有積怨嘅工黨成員郭紹傑,一口咬定係「本土派」搞佢哋,仲擺埋垂死嘅「本土民主前線」上枱,話「生於亂世」呢個專頁係「本民前」開嘅。「自決派」立法會議員朱凱廸就些牙(分享)咗「街工」執委朱江瑋個帖文:「『罷工基金』都抹黑,小心生仔冇屎忽。」

「無敵神駒」仇思達就摷返李卓人啲衰嘢嚟講:「肥佬黎(黎智英)捐款給工黨,李卓人也將其中50萬『袋住先』,直至被傳媒揭發才轉回工黨。李卓人就是擁有這樣往績的政客,繼續捐款給他的人都是甘願上釣的笨×。」

文匯報記者:陳庭佳

Do NOT follow this link or you will be banned from the site!