2018年11月17日,星期六
首頁 / 生活 / 荔園唔搞遊樂場搞茶餐廳

荔園唔搞遊樂場搞茶餐廳

荔園又返嚟喇!不過今次唔係搞遊樂場,而係首次踩入飲食界,以茶餐廳形式同香港市民見面!記者尋日出席荔園茶餐廳嘅開幕儀式,唔少名人明星都有捧場,2280呎嘅餐廳迫爆嘉賓同記者,場面非常墟冚。

今日正式開業的荔園茶餐廳落戶喺尖沙咀,成個布局都保留昔日樂園的神髓。荔園的吉祥物「老虎仔」將會成為「生招牌」,配上天花的旋轉木馬和拱形木吊燈,色調就以淺色和橡木為主,懷舊得嚟又「小清新」,絕對係「打卡」好去處。

講起荔園,唔知你有冇掛住隻炸雞髀呢?荔園主席邱達根同記者講,茶餐廳將會用「荔園招牌炸雞髀配豉油皇銀芽炒麵」做招牌菜,盛惠78蚊,而昔日的荔園恐龍屋代言人DINO雖然未能現身同大家見面,但就會統領招牌咖喱系列。飲品方面,除了經典嘅紅豆冰,仲有鮮菠蘿冰,成半個菠蘿畀你自己榨菠蘿汁,真係有得玩又有得食。

邱達根仲話,唔希望將荔園局限成一個遊樂場,而會當一個品牌咁做,希望做到韓國LINE FRIENDS的水平,成為香港人的自家品牌,再推廣到世界各地。記者就好奇,點解搞開遊樂場嘅荔園,會想搞飲食呢?佢就話,因為睇好飲食業前景,同埋茶餐廳夠「貼地」,今次投資幾百萬,希望市民鍾意,仲話如果生意理想,唔排除喺荔園原址開分店,繼續宣揚「簡單的快樂」精神,未來更會陸續以唔同形式推廣荔園品牌,大家可以拭目以待啦。

Do NOT follow this link or you will be banned from the site!