2017年11月23日,星期四
首頁 / 生活 / 九龍城潑水節 星期日「泰」好玩

九龍城潑水節 星期日「泰」好玩

thailand_20170405_590_001

香港嚟緊幾日嘅天氣熱返少少,介乎20至27℃。嚟緊禮拜日(9日)想玩得清涼啲?唔去沙灘一樣得,香港潑水節將會喺有「小泰國」之稱嘅九龍城上演,除咗重頭環節「水戰」夠晒刺激好玩外,仲可以即場試吓着泰國傳統服飾、學跳泰國舞蹈、整泰式木瓜沙律等,老少咸宜。

第三屆香港潑水節喺當日中午12點半開始,巡遊隊伍會由九龍城賈炳達道公園出發,途經城南道、衙前圍道及太子道西表演,最尾返去公園。巡遊除咗有泰國拳王「飛龍」沃高民及「冬蔭功」沙弟表演古泰拳,仲有150至250名成員表演傳統泰國舞蹈、現代歌舞、花式跳繩等,全程歷時大約個半鐘。

試着傳統服學跳泰國舞

至於喺賈炳達道公園搞嘅嘉年華,就有兩米高佛像供參拜,部分攤位會教導泰國舞蹈、試穿泰國傳統服飾、製作泰式木瓜沙律等。重點環節「水戰」將會喺九龍城城南道、南角道等多條街道上演。部分商舖會免費供水畀市民,仲會提供場地畀市民換衫。

香港潑水節負責人陳彩蓮作為本港土生土長嘅「泰二代」,話舊年有8000至一萬人參與,估計今年參與人數會再創新高。佢提醒想玩嘅市民,記得要帶齊衣物更換、搵定防水袋保護貴重物品。唔想濕身?唯一方法可能係嗰日唔好路過九龍城喇。