2019年11月17日,星期日
首頁 / 時事 / 焦點 / 朱凱廸博大霧 「拉布」新法

朱凱廸博大霧 「拉布」新法

ju_20170308_590

話說下年度124億元「基本工程儲備基金」,之前因為反對派喺立法會工務小組「拉布」,傾咗成十個鐘先上到財委會,眼見四月一號嘅限期愈嚟愈近,再唔通過撥款,屆時可能連馬路爆水管都無錢整。以為反對派議員應該玩夠啦,點知佢哋又有新搞作,朱凱廸尋日宣布要喺下星期財委會會議提出議案,要求檢討現時嘅撥款機制,將所謂「有爭議」嘅項目抽出獨立審議。嘩,咁仲得了?擺明就係借題發揮又想「拉布」,連財委會主席陳健波都擔心此例一開,猶如「生咗個新嘅拉布機制出嚟」,立法會將「永無寧日」。

其實,大家都知「基本工程儲備基金」整體撥款係為咗令政府更有效率咁進行規模較小嘅工程項目,唔使下下到立法會攞錢,以今年撥款涉及接近9600個項目為例,遍布全港各區。陳健波話齋,如果議員為各自代表嘅地區利益要求將項目抽出討論,立法會日後恐怕會「永無寧日」。不過,基於議員有咁嘅建議,佢都話要諮詢法律意見,再作處理,可能要召開特別會議處理制度改革問題。

朱凱廸尋日仲話,如果佢嘅議案獲得通過,會作出「讓步」,只要求將涉及元朗橫洲發展嘅兩個項目剔走。但話說佢哋早前聲稱,包括橫洲發展在內嘅26個項目都有「爭議」,但依家就突然剩低朱議員所屬選區嘅橫洲發展「有爭議」,真係非常好奇「有爭議」嘅標準係咩,朱議員嘅「布」果真剪不斷, 「理」還亂─強詞奪理個「理」!

大公報:鄭晴

Do NOT follow this link or you will be banned from the site!